نوفيلا التعلب الفصل الثالث والاخير بقلم الكاتبة فريدة الحلواني فقط وحصريا
نوفيلا التعلب الفصل الثالث والاخير بقلم الكاتبة فريدة الحلواني فقط وحصريا
الفصل الثالث والأخير
صباحك بيضحك يا قلب فريده
ظل فهد واقف أمام الباب المغلق خمس دقائق ثم عشر
ثم انحنى وجمع الورد المبعثر من على الأرض وردة وردة رتبه في الباقة من جديد كأن ترتيبه سيصلح شئ ثم جلس على أول درجة من السلم أسند ظهره إلى الحائط وضم الباقة إلى صدره
ضابط المخابرات الذي اخترق قصر الريس وسرق أسراره من تحت أنف عشرين حارس مسلح يجلس الآن على سلم عمارة قديمة في المنيل يحتضن الورد كطفل طردته أمه من البيت
همس لنفسه:
- هي هتفتح هي دايمًا بتفتح
لم تفتح... مرت ساعة انطفأ نور السلم الأوتوماتيكي فلم يقُم ليُشعله نام فهد مكانه وهو جالس والورد في حضنه استيقظ على شيء يلكزه في كتفه
فتح عينيه بصعوبة فوجد امرأة في الخمسين ترتدي جلباب منزلي وطرحة ملفوفة على عجل تمسك في يدها مقشة تلكزه بطرفها:
- انت مين يا جدع انت وبتعمل إيه... نايم على السلم ليه؟
اعتدل بسرعة نظر حوله كان الصباح قد طلع كانت باقة الورد قد ذبلت نصفها
ثم نظر إلى المرأة وإلى الباب الذي خرجت منه... باب شقة رهف... وأدرك
قام وعدل قميصه الكُحلي المجعد مسح شعره بكفه ابتسم أعرض ابتسامة في حياته:
- صباح الخير يا طنط أنا فهد
ضيقت الأم عينيها وراحت تتأمله من رأسه إلى قدميه القميص المجعد والكدمة الزرقاء
والورد الذابل والابتسامة البلهاء ثم قالت ببطء:
- انت القطة ؟
- نعم!
- القطة اللي بتسهر مع بنتي لحد الساعة اتنين بالليل؟!
ابتلع فهد ريقه:
- أيوه يا طنط أنا القطة
نظرت إليه للحظات ثم نظرت إلى الكدمة في وجهه:
- وشك ماله ايه اللي مبهدلك كده؟
- سمكة ضربتني
- سمكة؟!
- سمكة شرسة يا طنط من النوع الخليجي
وضعت الأم المقشة جانبًا... كتفت ذراعيها وقالت:
- اسمع يا ابني أنا مش عارفة انت عملت إيه... بس بنتي
بقالها أسبوعين مبتاكولش ومبتنامش وامبارح سمعتها بتضحك
لوحدها في أوضتها ضحكة شريرة زي بتوع الأفلام فأيًا كان اللي عملته فانت في مصيبة
- عارف يا طنط
- لأ مش عارف
نظرت إلى الورد الذابل مدت يدها وأخذته منه:
- هات ده هحطه في ميه يمكن يفوق... انت مش هتفوق
أغلقت الباب في وجهه.
لم ترد رهف على رسائله... كتب لها مئة رسالة في يومين اعتذارات وتوسلات... نُكت سخيفة
صور شاورما مكتوب عليها دي وحشاكي... وحين لم تفتح أيًا منها أرسل لها صورة لنفسه وهو يبكي بكاء مصطنع وفي يده بصلة... فحظرته
جلس في غرفته في بيت أبيه بالإسكندرية يُحدّق في شاشة الهاتف التي ظهرت عليها جملة لا يمكن إرسال الرسائل لهذا الرقم ثم رمى الهاتف على الفراش وصاح:
- حظرتني أنا ضابط مخابرات واتحظرت
تجمد وأدرك أنه قالها بصوت عالي نظر إلى الباب المغلق بهلع... لحسن حظه كان آسر في الأسفل يشاهد مباراة ويصرخ على الحكم
تنفس فهد الصعداء ثم أخرج هاتفه الثاني واتصل بمعاذ:
- محتاج مساعدة
- مهمة؟
- أصعب رهف حظرتني
ضحك معاذ ضحكة طويلة حتى اضطر فهد أن يبعد الهاتف عن أذنه:
- خلصت؟
- لسه ثانية
ضحك مرة أخرى ثم قال:
- عايز مني إيه؟
- عايز أعرف هي بتعمل إيه... فين... مع مين
- انت عايزني أستخدم إمكانيات الجهاز عشان أراقبلك حبيبتك؟!
- آه
- لأ
- يا معاذ بالله عليك اتصرف وحياة سيلا يا جدع
- اتصرف لوحدك يا حضرة الظابط ده انت بتاع تنكر
أغلق... نظر فهد إلى الهاتف طويلًا ثم ابتسم ابتسامة بطيئة:
- بتاع تنكر.
في ظهيرة اليوم التالي دخل المكتبة الصغيرة في وسط البلد رجل عجوز
كان يرتدي بدلة رمادية قديمة واسعة عليه ونظارة سميكة الإطار وطاقية صوف رغم الحر كانت له لحية بيضاء كثيفة... يمسك عصا يتوكأ عليها ويمشي ببطء شديد كأن كل خطوة تكلفه عمره
كانت رهف تقف خلف المكتب ترتب الكتب اقترب العجوز وتنحنح وقال بصوت مبحوح مرتعش:
- يا بنتي عندك كتاب عن الفلسفة؟
رفعت رهف عينيها ونظرت إليه نظرت إليه بتركيز:
ثم قالت بهدوء تام:
- الدقن بتاعتك واقعة من الشمال يا فهد
تجمد العجوز ثم رفع يده بسرعة إلى خده تحسس اللحية المزيفة التي انفصل طرفها فعلا وصار يتدلى حاول أن يلصقه بإصبعه وهو يحافظ على صوته المرتعش:
- فهد مين يا بنتي أنا الحاج عبد الصبور
- الحاج عبد الصبور لابس كوتشي بخمستلاف جنيه؟!
نظر فهد إلى قدميه كان قد نسي أن يغير الحذاء
تنهد وخلع النظارة والطاقية رمى العصا على الأرض وانتزع اللحية المزيفة دفعة واحدة فصرخ من الألم:
- آه دي كانت لازقة في جلدي بجد
لأول مرة منذ أسبوعين ارتعشت زاوية فم رهف كأنها على وشك أن تضحك لكنها تمالكت نفسها وعادت ترتب الكتب ببرود:
- عايز إيه
- عايز أتكلم معاكي شويه ولازم تسمعيني
- مفيش كلام بينا خلاص
- رهف أنا
- انت إيه انت كنت فين في الغردقة
- لأ أنا
- هُش
رفعت إصبعها في وجهه أشارت نحو باب المكتبة حيث دخل زبون ثم قالت بصوت عالي ومهذب:
- أهلا يا فندم اتفضل الأستاذ ده كان ماشي
نظرت إلى فهد نظرة حادة:
- صح يا حاج عبد الصبور؟
خرج فهد من المكتبة يحمل العصا واللحية في يده والناس في الشارع ينظرون إليه بدهشة ركب سيارته
رمى كل شيء في المقعد الخلفي وضرب المقود بكفيه
ثم رن هاتفه العادي... كانت جودي
- فهد انت فين؟
- في القاهرة ليه؟
- آسر بيقولي إن فيه بنت جت تسأل عليك في البيت وانت مسافر
واحدة اسمها رهف بتقول إنها صاحبتك
تجمد فهد ولم يرُد قالت جودي بصوت ماكر:
- انت مكانش ليك صحبات فالكليه يا فهد
- آه ده هي هي صاحبتي من الكافيتريا بتاعة الكلية
- فهد
- نعم
- مين رهف؟
صمت لحظة ثم قال بصوت لم تسمعه أخته يستخدمه من قبل صوت حقيقي بلا هزار:
- البنت اللي هتجوزها يا جودي لو وافقت
صمتت جودي على الطرف الآخر من الذهول ثم صرخت صرخة جعلته يبعد الهاتف عن أذنه:
- يا ياسر يا ياسر تعالى فهد بيحب
عاد فهد إلى المنيل في المساء وقف على الرصيف المقابل للعمارة يراقب نافذتها من بعيد
ثم رأى باب العمارة ينفتح وتخرج منه أم رهف تحمل أكياس الخضار وحين رأته على الرصيف توقفت وتنهدت ثم عبرت الشارع نحوه:
- انت لسه هنا؟
- أيوه يا طنط
- بقولك إيه يا قطة أنا مش هتدخّل بس أنا أم وبحب بنتي وحاسة إنك بتحبها
- بحبها أكتر من نفسي يا طنط
نظرت إليه للحظات ثم قالت:
- يبقى لازم تعرف إن فيه عريس جاي يوم الخميس
شعر فهد كأن أحد سكب عليه ماء مثلج
- عريس!
- كريم ابن سعاد جارتنا راجع من الخليج وشاري شقة
في التجمع وعربية جديدة رهف وافقت إنه ييجي
- وافقت؟!
- وافقت ومش بس كده طلعت الفستان الأحمر
- فستان أحمر؟!
- فستان أحمر قصير شارياه من سنة محدش
شافه قالتلي كانت شارياه ليوم خطوبتها
ثم مالت عليه وأضافت هامسة:
- مش عارفة ليه حاسة إنها كانت شارياه ليوم خطوبتها منك انت
تركته واقف على الرصيف كالتمثال ومضت اتصل بمعاذ في منتصف الليل:
- عريس يا معاذ فيه عريس
- وأنا مالي
- يوم الخميس
- برضه وأنا مالي
- معاذ انت لازم تيجي معايا
- أجي فين؟
- أتقدم يوم الخميس في نفس الميعاد
صمت معاذ للحظة ثم قال ببطء:
- انت عايز تروح تتقدم لبنت في نفس اللحظة اللي فيها عريس تاني قاعد في الصالون؟!
- آه
- انت اهبل ياض ده انتحار يا فهد
- أنا اتعودت على المهمات الانتحارية
- وهتقول لأبوها إنك بتشتغل إيه؟
صمت فهد فهو لم يفكر في هذا... ضحك معاذ ثم قال:
- خلاص أنا جاي بس بشرط
- إيه؟
- لما يسألوك بتشتغل إيه متقولش في الأكل
ولا تقول انك ابن سفيان الجابري.
جاء يوم الخميس... في السابعة مساءًا كان صالون شقة رهف يلمع من النظافة والعصير موزع في الأكواب
والجاتوه مرصوص على الصينية كان والد رهف يجلس على الأريكة الكبيرة يرتدي بدلته الوحيدة
ويحاول أن يبدو مهيبًا... أمها تجلس بجواره تنظر إلى الباب كل دقيقة بقلق
في الأريكة المقابلة جلس كريم
كان شاب في الثلاثين بشعر مصفف بالجل حتى يلمع وساعة ذهبية ضخمة يحرص أن يرفع معصمه كلما تحدث لتظهر... كانت سعاد تجلس بجواره تنظر إليه كأنه فاز بجائزة نوبل
قال كريم وهو يرفع معصمه:
- أنا الحمد لله شغال في دبي من سبع سنين مدير مبيعات
والشقة في التجمع تلات غرف وريسبشن والعربية زيرو
هز والد رهف رأسه وقال:
- ربنا يوفقك يا ابني
ثم انفتح باب الغرفة الداخلية وخرجت رهف... ساد الصمت
كانت ترتدي الفستان الأحمر فستان ينساب على جسدها كأنه صنع لها وحدها يكشف كتفيها البيضاوين ينتهي فوق ركبتيها بقليل كان شعرها الأسود منسدل على ظهرها وشفتاها مطليتان بأحمر يطابق لون الفستان
شهقت أمها وسعل أبوها سعال عنيف انفتح فم كريم حتى كاد الجاتوه يسقط منه
قال الأب من بين سعاله:
- رهف يا بنتي انتي متأكدة من الفستان ده؟!
ابتسمت رهف ابتسامة هادئة جلست على المقعد المنفرد وضعت ساق فوق ساق
- متأكدة يا بابا ده فستان محترم جدًا
في تلك اللحظة دق جرس الباب... دق مرة ثم مرتين ثم ثلاثًا بإلحاح
قامت الأم وفتحت وقفت متجمدة
كان فهد يقف على العتبة يرتدي بدلة سوداء أنيقة في يده باقة ورد أحمر ضخمة وعلبة شيكولاتة خلفه وقف معاذ ببدلة رمادية ووجه جاد يليق بمدير شركة وبجوار معاذ وقف سفيان يحمل علبة جاتوه ويبدو عليه
الارتباك التام كأنه لا يعرف لماذا هو هنا أصلا و قد طلب منه معاذ الا يخبرهم أنه رجل اعمال شهير و بعد انتهاء الأمر سيخبره سبب ذلك
كان خلفهم جميعًا آسر وجودي وياسر
كان آسر يحمل صينية بسبوسة كبيرة قال فهد بابتسامة عريضة:
- مساء الخير يا طنط احنا جايين نتقدم
نظرت إليه الأم ثم إلى الجيش الذي يقف خلفه ثم التفتت ببطء إلى الصالون حيث العريس الآخر ثم قالت بصوت ضعيف:
- اتفضلوا
دخلوا جميعا وامتلأ الصالون الصغير حتى لم يعد فيه موضع لقدم جلس والد فهد بجوار والد رهف
على الأريكة الكبيرة وصافحه بحرج جلس معاذ على المقعد جانبي ووقف ياسر وجودي عند الباب
لأنهما لم يجدا مكان جلس آسر على مسند الأريكة ممسك بالبسبوسة كأنه لا يعرف أين يضعها جلس فهد مباشرة قبالة كريم بوجه يملأه الجدية
كانت رهف تنظر إليه من مقعدها بعينين تشتعلان لكنها لم تقل شيئًا
ثم وقعت عينا آسر عليها تجمد ثم أشار إليها بالبسبوسة:
- انتي انتي اللي جيتي البيت صاحبة فهد؟
قال فهد من بين أسنانه:
- آسر اسكت
- بس هو مكانش ليه صحبات
- آسر
- خلاص سكت
مد آسر يده وأكل قطعة من البسبوسة التي يحملها
تنحنح والد رهف محاولا استعادة السيطرة على الموقف نظر إلى فهد:
- أهلا يا ابني بس احنا عندنا ضيوف زي ما انت شايف
قال فهد بأدب:
- عارف يا عمي وأنا آسف إني جيت كده بس أنا
لو كنت استنيت ليوم تاني كنت هندم طول عمري
ثم التفت إلى كريم ومد يده يصافحه:
- أهلا يا كابتن أنا فهد
صافحه كريم بتعالي:
- كريم مدير مبيعات في دبي
- ما شاء الله أنا بحب دبي جدًا فيها شاورما حلوة
ضحكت جودي ضحكة مكتومة فلكزها ياسر
رفع كريم معصمه ليظهر الساعة وقال:
- وحضرتك بتشتغل إيه؟
ساد الصمت... التفتت كل العيون نحو فهد... أبوه وآسر وجودي ينتظرون بفضول حقيقي
فهم أنفسهم لا يعرفون فتح فهد فمه ليرد لكن معاذ سبقه تنحنح وقال بصوت رزين:
فهد بيشتغل معايا أنا معاذ مدير الشركة وفهد من أهم الموظفين عندنا... احنا شركة استشارات أمنية
نظر إليه والد فهد بدهشة:
- استشارات أمنية... فهد!
- آه يا حاج فهد شاطر جدًا في شغله بس متواضع ومبيحبش يتكلم
التفت الأب إلى ابنه وقال بغيظ:
- المدير بيشكر فيك دي حاجة حلوه بس ليه مش بشوف حاجة من مرتبك يا فهد؟
- بصرفه على الأكل
ضحك والد رهف رغمًا عنه وارتخت ملامح أمها أما كريم فقد ضيق عينيه وقال بسخرية:
- استشارات أمنية يعني بتُستشار في إيه...؟في الأكل!
ابتسم فهد ابتسامة بطيئة... مال إلى الأمام وقال بهدوء:
- يعني مثلًا يا كابتن كريم الساعة اللي في إيدك دي تقليد
الماركة الأصلية منها التاج بتاعها فيه سن واحد زيادة والعقرب
بيمشي ناعم مش بيتنطط وانت كمان مش مدير مبيعات
انت مندوب مبيعات عشان الكارت اللي طالع من جيبك
مكتوب عليه سيلز
ساد صمت ثقيل نظر كريم إلى معصمه ثم إلى جيبه حيث تطل حافة الكارت فعلًا
ثم احمرّ وجهه حتى صار بلون الفستان
شهقت سعاد... رفع والد رهف حاجبيه حتى كادا يلامسان شعره
أما رهف فقد عضّت على شفتها السفلى بقوة كانت ترتجف ولم يكن أحد يعرف إن كانت ترتجف من الغضب
أم من الضحك الذي تحاول أن تخفيه
قامت فجأة نظرت إلى فهد وقالت بصوت حاد:
- ممكن أكلمك في المطبخ؟
ما إن دخلا المطبخ حتى أغلقت رهف الباب واستدارت نحوه دفعته بكلتا يديها حتى التصق ظهره بالثلاجة:
- انت مجنون جايب أهلك وأخواتك وجوز أختك ومعاذ... وآسر شايل بسبوسة!
- البسبوسة دي فكرة آسر
- فهد
- أيوه
- انت بوظتلي الخطوبة
- لأنه عريس كداب ساعته مزيفة وشغله مزيف
-وانت مش مزيف؟
صمت فهد... اقتربت منه أكثر حتى صار وجهها على بعد شبر من وجهه
كان عطرها يملأ المطبخ الضيق والفستان الأحمر يلامس قميصه قالت بصوت منخفض يرتجف:
- انت كدبت عليا... بصيت في عيني وقولتلي خلاص وتاني
يوم اختفيت... عارف أنا عملت إيه في الأسبوعين دول؟
كنت بقوم من النوم أدوّر على اسمك في الأخبار كنت
بخاف أفتح التلفزيون كنت بقول يمكن ميرجعش
يمكن المرة دي ميرجعش
ضربته على صدره بقبضتها:
- وانت رجعتلي بوردة وسمكة ضربتك في وشك
- أنا مقولتلكيش حكاية السمكة!
- ماما قالتلي
رغم كل شيء ضحك فهد ضحكة قصيرة خرجت منه رغمًا عنه فضربته مرة أخرى:
- متضحكش
أمسك يديها الإثنتين وضمهما إلى صدره نظر في عينيها لم تكُن على وجهه أي ابتسامة
لا قناع ولا تمثيل فقط فهد الحقيقي الذي لا يراه أحد سواها:
- رهف اسمعيني المرة دي ومش هكدب
صمتت وكانت عيناها تلمعان بدموع تأبى أن تسقط:
- أنا امبارح قدمت طلب نقل مش هطلع مهمات تاني هبقى
مدرب في الأكاديمية هعلم الولاد الجداد إزاي يمثلوا إنهم أغبيا
نظرت إليه بريبة:
- انت بتكدب؟
- مش بكدب
- انت دايمًا بتقول كده
أدخل يده في جيب سترته الداخلي أخرج ورقة مطوية فتحها أمام عينيها كانت ورقة رسمية عليها ختم
وفي أسفلها توقيع وتاريخ أمس قرأتها رهف مرة ثم مرتين ثم رفعت عينيها إليه:
- ده بجد؟!
- معاذ اللي وافق عليه بنفسه اسأليه
- ليه؟
اقترب منها وأسند جبينه إلى جبينها وهمس:
- عشان أنا كنت في قصر فيه عشرين واحد معاهم سلاح
وواحد فيهم ضربني في وشي ومخوفتش... بس لما انتي قفلتي
الباب في وشي أنا خوفت أول مرة في حياتي أخاف بجد
سقطت دموعها أخيرًا... مسحها بإبهامه... واحدة واحدة ثم انحنى ببطء
وطبع قُبلة على جفنها المبلل وتوقف
نظر في عينيها يسألها... كانت رهف قد قررت أنها ستعذبه أكثر وأنها ستجعله يعاني أسابيع
وأنها ستريه معنى الخذلان لكن قلبها لم يكن قد قرأ الخطة
فأمسكت بياقة قميصه وجذبته إليها
كانت قُبلة جائعة غاضبة فيها كل الليالي التي بكتها و الخوف الذي حملته وحدها ثلاث سنوات شعرت بيديه تنزلقان إلى خصرها وتشدانها إليه حتى ارتطمت الثلاجة خلفه بالحائط وسقط مغناطيس على شكل بطيخة من على بابها وتدحرج على الأرض
ابتعدت عنه فجأة وهي تلهث ووجهها شديد الإحمرار:
- لأ لأ مش قبل المأذون
نظر إليها بعينين مشتعلتين وصدره يعلو ويهبط:
- يبقى المأذون بكرة
- مش بكرة لسه هتتعذب شوية
- قد إيه؟
فكرت لحظة ثم قالت:
- أسبوع
- أسبوع كتير
- ده عقاب مخفف على فكرة
ثم دفعته نحو الباب عدلت فستانها وشعرها مسحت أحمر الشفاه الذي انتقل إلى فمه بإبهامها
وقالت بتهديد:
- ولو كدبت عليا تاني أنا مش هقفل الباب في وشك
أنا هقفله عليك وأرمي المفتاح في النيل
- مش هكدب تاني اقسم بالله
- قولها تاني
- مش هكدب يا رهف والله العظيم
نظر اليها بغضب حقيقي وغيره أشعلت صدره ثم قال:
- كل اللي عملتيه وهتعمليه حقك... بس حقي أنا بقى
أنا هطلع ميتين أهلك على أم الفستان ده
خافي من اللي هعمله فيكي بجد يا رهف بس نخلص من ابن الكلب اللي بره ده.
حين عادا إلى الصالون كان كريم وسعاد قد رحلا كان آسر قد أنهى نصف صينية البسبوسة ووالد رهف
ووالد فهد يتحدثان عن أسعار الطماطم كأنهما صديقان منذ الطفولة
نظرت الأم إلى ابنتها ثم إلى فهد ثم إلى شفتيه التي ما زال عليها أثر أحمر خفيف
ثم قالت بهدوء:
- يا حاج أنا شايفة إن البنت موافقة
التفت والد رهف إلى ابنته:
- موافقة يا رهف؟
نظرت رهف إلى فهد ثم ابتسمت ابتسامة خبيثة:
- موافقة يا بابا بس مفيش حاجة هتّم إلا بعد أسبوع
صفق آسر بيديه وصاح:
- يبقى البسبوسة الباقية دي عربون
أطلقت جودي زغرودة جعلت الجيران في الدور العلوي يطرقون على الأرض
مال معاذ على فهد وهمس:
- مبروك يا حضرة المستشار الأمني.
بعد أسبوع واحد بالضبط عُقد القران في شقة المنيل و قد أخبر سفيان والد رهف بالحقيقة وبشخصيته الحقيقية وقد برر له أن تلك رغبة ولده حتى لا يعتقد كريم أنها اختارت فهد لأنه اغنى منه فقط.
كان أغرب كتب كتاب شهدته المنطقة
فقد أصرّ فهد على أن يكون البوفيه كله شاورما فراخ وشاورما لحمة وشاورما سوري وفتة شاورما لم يجد أحد الشجاعة ليعترض حتى المأذون قال بعد أن أنهى العقد وهو يمسح يديه:
- أنا عقدت ألف جوازة أول مرة آكل شاورما في كتب كتاب والله فكرة.
جاء الجميع حسن وغالية وسالم الذي ظل يقول لسمر طول الليل شوفتي يا بابا الواد ده طلع بيشتغل
وتميم وعدي وضي وسما التي احتضنت رهف وهمست لها:
- خليه يحبك زي ما ياسر بيحب جودي
وسيلا التي جلست بجوار معاذ ظلت ترمق محمد بنظرات قاتلة لأنه أخذ آخر سندوتش
كانت رهف ترتدي فستان أبيض بسيط كان فهد لا يستطيع أن يرفع عينيه عنها
وحين قال المأذون بارك الله لكما وبارك عليكما انحنى فهد على أذنها وهمس:
- خلاص بقيتي مراتي
- كتب كتاب بس يا حضرة الظابط لسه الفرح
- كتب الكتاب ده بيدي صلاحيات معينة
- زي إيه؟
- زي إني أقولك تعالي السطح.
على السطح كان الليل صافي والقمر معلق فوق النيل كمصباح كبير
ما إن أغلق فهد الباب خلفهما حتى استدار وحملها بين ذراعيه دار بها كما فعل على كورنيش الإسكندرية فصرخت ضحكت وتعلقت برقبته
أنزلها على السور القديم وأحاط وجهها بكفيه وقال:
- فاكرة العربون؟
- أي عربون؟
- الحاجة اللي كنتي هتقوليهالي في ودني
احمرّت وجنتاها واحمرت أذناها ثم ابتسمت ابتسامة ماكرة جذبته من ربطة عنقه حتى صار قريب جدًا
قربت شفتيها من أذنه وهمست بشيء... همسة طويلة
كان فهد يسمع وكانت عيناه تتسعان شيئًا فشئ كانت أذناه تحمران ثم ابتعد عنها ونظر إليها بذهول تام:
-رهف
- إيه
- ايه يابت قلة الأدب دي؟!
- ما أنا مراتك دلوقتي
- كتب كتاب بس انتي اللي قولتي
ضحكت حتى مالت إلى الخلف فأمسك بها قبل أن تسقط من على السور وجذبها إلى صدره
قبّلها قُبلة طويلة بطيئة تحت ضوء القمر... قُبلة رجل لم يعُد عنده ما يخفيه شعر بأصابعها تتسلل إلى شعره وتشده إليها أكثر وبأنفاسها تتقطع على شفتيه
لم يتركها هذه المرة
انزلقت شفتاه من فمها إلى خط فكها ببطء ثم إلى عنقها حيث ينبض عرقها تحت جلدها كعصفور محبوس فشهقت وتشبثت بكتفيه وأمالت رأسها دون أن تدري تفسح له الطريق
همس على جلدها بصوت أجش:
- تلات سنين يا رهف... تلات سنين وأنا بعد الأيام عشان أوصل للحظة دي
كانت يداه تحيطان خصرها وتشدانها إليه حتى صارت بين ذراعيه كأنها جزء منه
كانت يداها قد تسللتا تحت سترته وراحت أصابعها تتحسس ظهره من فوق القميص حتى وقفت عند الندبة الصغيرة عند خاصرته توقفت أصابعها هناك وضغطت عليها برفق
فارتجف فهد من رأسه إلى قدميه رفعت عينيها إليه وهمست بصوت ناعم يذيب الحجر:
- دي بتاعتي فاكر... دي الوحيدة اللي أنا عارفة حكايتها
- فاكر
- هتفضل الوحيدة مفيش ندبة تانية يا فهد مفيش جرح تاني.
وقفت على أطراف أصابعها طبعت قبلة بطيئة على الكدمة التي بهتت في وجهه
ثم قُبلة أخرى على زاوية فمه ثم عضت شفته السفلى عضة خفيفة جعلته يطلق أنينا مكتوم
ويغمض عينيه... قال من بين أسنانه:
- رهف انتي بتلعبي بالنار
ابتسمت ابتسامة شريرة:
- مش انت اللي قولت إن كتب الكتاب بيدي صلاحيات
- أنا قولت كده عشان أقنعك تطلعي السطح مش عشان تموتيني
مدت يدها وراحت تفك ربطة عنقه ببطء شديد عيناها في عينيه وسحبتها من حول عنقه لفتها على يدها
ثم فكت الزر الأول من قميصه ثم الثاني وهي تنظر إليه بتحدي
ابتلع فهد ريقه بصعوبة وقال بصوت مبحوح:
- انتي عارفة إن ظابط المخابرات متدرب يستحمل التعذيب صح؟
- عارفة
- بس محدش دربني على ده
ضحكت ضحكة خافتة مليئة بالدلال ثم وضعت كفها على صدره المكشوف حيث يدق قلبه بجنون وقالت:
-عشان تعرف إن جه دوري بجد
أعادت الزر الثاني مكانه ثم الأول بكل هدوء ولفت ربطة العنق حول عنقه من جديد وربطتها بإتقان ثم ربتت على صدره كأنها تعدل هندامه قبل اجتماع مهم:
- ده لحد الفرح يا حضرة الظابط
نظر إليها فهد بذهول ثم رفع عينيه إلى السماء وقال بصوت يائس:
- يا رب أنا اتخطفت وانضربت وعمري ما اتعذبت كده
جذبها إليه رغم كل شيء وضمها إلى صدره بقوة كأنه يخشى أن تطير منه ودفن وجهه في شعرها ظلا هكذا يضحكان ويتهامسان تحت القمر
حين ابتعدا أخيرًا همست وجبينها على جبينه:
- فهد
- نعم
- انت بجد مش هتطلع مهمات تاني؟
- بجد
- هتفضل تهزر وتاكل وتعمل نفسك أهبل قدام الناس
- طول عمري ده سلاحي السري
- طب وقدامي؟
نظر في عينيها وقال:
- قدامك أنا فهد بس
ابتسمت وأسندت رأسها على صدره سمعت قلبه يدق بهدوء لأول مرة منذ عرفته
هدوء رجل وصل أخيرًا إلى بيته... وفجأة انفتح باب السطح بقوة
ظهر آسر يحمل طبق من الشاورما وقال بلهفة:
- فهد البوفيه خلص وفيه ناس لسه جعانة هو انت مخبي شاورما فين
نظر إليه فهد ببطء ثم نظر إلى رهف ثم عاد ينظر إليه وقال بصوت بارد خطير لم يسمعه آسر منه في حياته:
- آسر انزل
تجمد آسر في مكانه وارتعش الطبق في يده ثم قال بصوت ضعيف:
- انت انت صوتك اتغير ليه كده؟!
- انزل يا آسر
- نازل نازل
أغلق الباب وهرب... سمعاه يصيح على السلم:
- يا جودي فهد بقى مخيف الجواز غيره.
انفجرت رهف ضاحكة حتى دمعت عيناها ضمها فهد إليه وهو يضحك معها كان القمر فوقهما
يشهد على أن ظابط المخابرات الذي لم يهزمه أحد... قد هُزم أخيرًا
هزمته بنت من المنيل بفستان أحمر وجملة واحدة... وحياة كدبك عليا
تمت
