بوابة القدر الفصل الثاني بقلم بسنت محمد عمر
بوابة القدر الفصل الثاني بقلم بسنت محمد عمر
.jpg "بوابه القدر بقلم بسنت محمد عمر")
بوابة القدر
الفصل الثاني
بقلم بسنت محمد عمر
الفصل الثالث
سيدال كانت موجوده فى عملها الخاص ... كانت بتعشق الأعشاب والوصفات وصنع العطور ... كانت بتعمل المرادى وصفة من أعشاب البحر ... دخل عليها أخوها عامر بدوشته المعتادة ... هو أكبر منها بسنة وأقرب أخواتها لها .
عامر : بتعملى إيه يا طبيبة المستقبل ؟
سيدال : بحضر وصفة جديدة وإن شاء الله هتعالج ناس كتير .
عامر : اممم ربنا يستر من وصفاتك ... المهم ... أخواتك سافروا بالمحاصيل والزعيم منبه عليا أنك متخرجيش من البيت .
سيدال : نعم ؟! ليه بقي ؟ أنا محتاجه أخرج علشان عندى مريض محتاجه أشوفه وكمان الوصفة دى له
عامر : والله ده أمر الزعيم يعنى مش هقدر أكسره .
لمح عامر السلسلة على رقبة سيدال.
عامر : إيه اللى على رقبتك ده ؟ اللى أعرفه أنك مش بتحبى تلبسي الحاجات دى .
سيدال (مسكت الصدفة فى إيدها) : بص أنا هحكيلك ... أنا لاقيتها على البحر وأستغربت منها لأن شكلها غريب عن الموجود عندنا ... قولت ممكن حد من البحارة أو حد غريب عن القرية جابها معاه .
عامر : هى شكلها غريب فعلا ... لكن إيه المميز فيها لدرجة أنك تلبسيها وأنتى بتكرهى الأطواق جدا .
سيدال(قربت الصدفة من عامر) : طيب أسمع كده .
قرب عامر منها فى حين سيدال كانت مستنيه رد فعل عامر وانبهاره ... لكن مظهرش على ملامحه أى شيء .
سيدال : ها سمعت إيه ؟
عامر : مسمعتش حاجة غير صوت البحر .
سيدال : إزاى؟ (قربتها من ودنها وسمعت همس "نوح" ) ... عامر فى إسم بيتقال فيها .
عامر : لا مفيش ... (قربها منه تانى) ... لا مفيش حاجة .
سيدال : يا عامر بتقول إسم واضح جداً ... فى صوت راجل بيهمس بيه .
عامر : كمان صوت راجل ... وبيقول إيه إن شاء الله ؟
لسه سيدال كانت هتقول على الإسم لكن دخل فجأة الخادم بتاعهم .
الخادم : سيدى ... فى شاب بيستناك تحت بيقول إسمه صقر .
عامر : هنزل وراك ... أنا هنزل علشان صقر جه .
سيدال: صقر ؟! أول مرة أسمع إسمه هنا .
عامر : دا مبارز بالسيف ومشهور فى بلده ... بعتله مرسال إنى محتاج تدريب ف هو جه ... هنزل أشوفه .
سيدال : ماشي ... خلى بالك على نفسك .
عامر (أبتسم وباسها من خدها ) : خليها على الله .
كملت سيدال شغلها بعد خروج عامر لكن أفتكرت موضوع السلسلة ساعتها قربتها من ودنها وكان الصوت أقوى وأوضح من كل مرة ... ونفس الإسم ونفس النبرة بتتقال ... لكن يمكن أشد من الأول ... أستغربت كلام أخوها لكن شغلها ريحة التركيبة ونسيت موضوع السلسلة .
عند سنقر ....
سنقر : وبعدين يا عوف هنعمل إيه ؟
عوف : هنستنى بس ولاد عمك يبعدوا وساعتها هنجمع الرجالة ونهجم على القرية .
صابح : ما ولاد عمه برا القرية ... أخدوا المحاصيل وسافروا .
عوف : أيوا يا غبي ... لكن لسه فى الطريق يعنى يقدروا يرجعوا فى أى وقت ... لكن لما يوصلوا لوجهتهم كده خلاص بعدوا ... ومش هيقدروا يرجعوا غير بعد ما نكون خلصنا مهمتنا.
سنقر : ااااه ... يا ما نفسي أمسحهم مسح ... زى ما اتنفيت .
صابح : هانت يا صاحبي ... بكرة نهجم عليهم .
سمكة : والحلوة تبقي من نصيبك .
سنقر : ويبقي ليكى الحلاوة يا خاله
سمكة : والحلاوة بتاعتى كبيره يا قلب الخاله .
سنقر : هتاخديها ولو حتى اخدتى نص الأراضي .
سمكة: أمممم وماله .
عند عامر وصقر ... فى صالة التدريب .
صقر : جميل ... حاول ترجع خطوة ورا وشد ضهرك وركز مع حركة جسم اللى قدامك .
عامر : أنا تعبت ... بقالنا ساعتين ... نريح بقي شوية .
صقر : ماشي ... أنا مضطر أرجع علشان الوقت قرب يبقي ليل .
عامر : ومعادنا الجاى أمتى أن شاء الله؟
صقر : بكرة لو حبيت .
عامر : نتقابل بكرة بإذن المولى .
صقر : بإذن الله ... مع السلامة .
قعد عامر يريح على كنبه فى ساحة التدريب وخرج صقر بعد ما ودعه ... وأثناء خروجه لمح حد بيتسلل ل برا البيت ... كان واضح أنها بنت ... كانت لابسه فستان واسع وحجابها مغطى شعرها وساحبه جزء منه مغطى وشها ومش ظاهر منه غير عيونها ... كانت واقفة بتراقب برا سور البيت علشان تخرج بسرعة ... قرب منها صقر بهدوء ومسك دراعها فجأة ف صرخت بفزع ولفت تبص له .
صقر (كان لسه ماسك دراعها) : أنتى مين ؟
سيدال : سيب دراعى يا بنى ادم ... أنت اللى مين ؟
صقر : بيتهيئلى أنا اللى بسألك دلوقت ... كنتى بتعملى إيه ف البيت ده ؟ (سحب شنطتها بعنف) أكيد سارقه حاجة مش كده ؟
سيدال(صرخت) : سيب شنطتى ... أنت مجنون ... أنت اللى مين وبتعمل إيه هنا ؟
صقر (بدأ يعلى صوته) : يبقي ننادى صاحب البيت ويعرفك مين أنا ... يا عامر ... عامر .
جه عامر جرى بعد ما شاف صقر واقف مع حد عند البوابة وبيصرخ .
عامر : فى إيه ؟ ومين دى ؟ (ركز شويه فى تفاصيل البنت) ... هو أنتى ؟! (سحب الحجاب من وشها ) والله ... وبتعملى إيه ورايحه فين ؟
صقر : أنت تعرفها ؟
عامر : دى سيدال أختى ... بس تقريباً كانت ناوية تكسر القواعد كالعادة وتخرج من غير إذن .
سيدال : ما أنا قولتلك أن فى حد محتاجنى ... ومين ده ؟
كانت بتبص له بقرف واستهزاء .
صقر : أنتى بصه كده ليه ؟
عامر : دا صقر ... مدرب المبارزة بالسيف .
سيدال: دا مبارز ... مش باين عليه .
صقر : أنا ماشي ... مع السلامة يا عامر .
خرج وراه عامر بعد ما بص لها بمعنى عجبك كده ... واعتذرله وودعه وبعدين رجع ل سيدال .
عامر : كنتى رايحه فين مش قولتلك ممنوع؟
سيدال : حد مريض .
عامر : طيب هاجى معاكى وارجعك تانى ... وبكرة تعتذرى لصقر.
سيدال : معملتش فيه حاجة .
عامر : والله ... أنتى مش حاسة أن طريقتك كانت سيئة معاه .
سيدال : طيب ... نروح بس نشوف شغلنا وبعدين أشوف حكاية صقر ده .
بعد سيدال ما خلصت مهمتها ورجعت مع عامر كان الوقت بقي ليل ... جهزت نفسها للنوم ودخلت السرير ... كانت بتحاول تنام مش عارفه ... مسكت السلسلة وسمعتها كانت بتنادى ب "نوح" ... الصوت بقى أوضح وأقوى حتى عن اليوم بالنهار ... غمضت عينيها وراحت فى النوم ... ساعتها حلمت ب طائر يشبه " الصقر " كان بيطير فوق رأسها وبيمد مخلبه يشدها بيه ... كانت بتبعده لكن بصت تحت رجليها كانت بتنزل فى رمل كأنه بحر ... رفعت راسها للسما بسرعه تشوف الصقر وفعلا لقته ف مدت إيديها واترفعت معاه لفوق ... وقتها سمعت صوت بينادى ب "نوح" .
فى بيت تالين ....
تالين : ماما أنا زعلانه منك .
الأم : ليه يا توتا ؟
تالين : علشان بقالك يومين مش حكيتى حاجة وأنا عايزه أعرف سيدال هتعمل إيه .
الأم : أمممم طيب تعالى يا ستى أقعدى جنبي ... بس الأول خلصتى ال home work بتاعك ولا لأ .
تالين : اه .
الأم : طيب وقفنا فين ؟
تالين : لما سيدال نامت وحلمت .
الأم : ماشي يا ستى ... نكمل ...
سيدال بعد ما شافت الحلم قامت من النوم مفزوعة ومش فاهمه معناه أيه ... مسكت السلسلة اللى فى رقبتها وقربتها من ودنها سمعت نفس الصوت بنفس الاسم لكن بصورة أوضح من الأول ... كان صوت مميز ... قامت من السرير كان الوقت فجر ... صلت الفجر وجمعت أدواتها وخرجت ل معملها ... كان الجو هادى وفيه نسمة مميزة ... كانت بتخطف قلبها ... بعد ما نزلت للمعمل سمعت صوت خبط بسيط على باب البيت وبعدها شافت عامر بيفتح الباب ودخل منه صقر ... بصت له بإذدراء ولفت وشها ودخلت معملها ... بعدها دخل عامر وراها .
عامر : بلغى الخدم يجهزوا فطار ... عندى تدريب وعايز أبدأ .
سيدال : وهو مفيش غير صقر ده اللى يدربك ؟
عامر : أيوه ... دا مقاتل قوى بالسيف وكمان بيعرف فنون اللعب بالعصايا كويس .
سيدال : حاضر ... هجهز الفطار .
خرج عامر من المعمل ودخل ل صقر ... كان صقر بدأ يجهز أدوات التدريب ... بعد شويه سمعوا خبط بسيط على الباب و ما كانت إلا سيدال بتدخل الفطار .
عامر : مين ؟ الطبيبة بنفسها جايبه الفطار ؟
سيدال : أنا غلطانه علشان كنت خايفه حد يعطلك .
عامر : كتر خيرك سمو الأميرة سيدال .
سيدال (بصت ل صقر) : أنا جايه أعتذر لصقر عن اللى حصل أمبارح .
صقر ألتفت لها وكانت أول مرة يلتفت لها من وقت ما دخلت .
صقر (أبتسم بهدوء) : مفيش حاجة حصلت .
سيدال ردت ابتسامته وهزت راسها بهدوء وخرجت بدون أى كلمة .
رجعت دخلت تانى لهم ووجهت كلامها ل عامر .
سيدال : هو الزعيم فين وأخواتك هيرجعوا أمتى إن شاء الله ؟
عامر : والدك كالعادة خرج من بعد الفجر يشوف أمور المزارعين والنهاردة معاد وصول الصيادين فهيتجمع بيهم إن شاء الله فى سوق السمك ... وأخواتك بعتوا المرسال أنهم هيرجعوا النهاردة إن شاء الله ومش هيقعدوا لبكرة علشان خلصوا مهمتهم بمجرد ما وصلوا امبارح ... يعنى مسافة الطريق .
سيدال: طيب ... هو ممكن أروح النهاردة أبص على عم جابر ... علشان الجرح كان ملتهب أمبارح وأنت شوفته بعينك .
عامر : أمممم ... أخلص بس وهنشوف إن شاء الله.
سيدال : ماشي ... بعد إذنكم .
بعد خروج سيدال وأثناء الفطار ....
صقر : هى سيدال طبيبة ؟
عامر : بتدرس لسه لكنها متفوقة فى دراستها ... حتى الطبيب رسلان كان متوسم فيها خير كتير وهو أتولى تعلمها .
صقر (منبهر) : الطبيب رسلان!! دا من أكبر أطباء العاصمة وممكن نقول المملكة كلها .
عامر : شوفت بقي ... أختى طبيبة شاطرة ... يلا نكمل تدريب .
هز صقر راسه بإيجاب ولسه معالم الانبهار على ملامحه .
عند سنقر ....
عوف : أنا جمعت مجموعة كبيرة مننا ... ولسه مستنى جزء من الشمال ... على وصول ... بمجرد وصولهم هنهجم .
سنقر : المفروض يستعجلوا أكتر من كده ... قدامنا يوم واحد قبل أمام وأخواته والفرسان اللى معاهم ما يوصلوا .
صابح : ماهم كده كده هيوصلوا بكرة ... ف قدامنا وقت ... وبيت عمك وحكمه هيبقي تحت أمرك .
سمكة (بإبتسامة خبيثة ) : وبنته كمان .
سنقر : هتعملى اللى قولتى عليه ؟
سمكة : طبعاً... بمجرد ما هوصل هسحبها للمينا بعيد عن إيدين الكل وساعتها تقدر تتصرف معاهم براحتك ... أهم شىء يكون المركب فى مكانه .
سنقر : فى مكانه ... محدش يقدر يقربله ... الكل عارف هو ملك مين .
سمكة : ماشي يا زعيم ... هسبق أنا على طرف القرية ... بمجرد دخولكم هتتسلل للعروسة .
سنقر : لو عملتى المطلوب تمام ... مكافئتك هتكون كبيرة ... أهم حاجة إبعديها عن عين عامر فى الوقت المناسب .
سمكة : أوامرك يا زعيم .
الوقت قرب الضهر ... كانت سيدال خرجت علشان تشوف عم جابر وتغير على جرحه ... كان معاها عامر بعد ما صقر رجع المينا علشان يرجع قريته .
بعد خروجهم من بيت عم جابر ... لاحظوا حركة غريبة ... وناس بتجرى فى كل مكان .
سيدال : إيه بيحصل ؟
عامر (مسك راجل بيجرى قصادهم) : إيه اللى بيحصل ؟
الراجل : المهاجير ... المهاجير هجموا على بيت الزعيم واللى بيقودهم سنقر ابن عمك وانتشروا فى كل مكان ... بيخربوا الدكاكين والأراضى .
عامر ساب الراجل مكانه ودخل سيدال بيت عم جابر وجرى ناحية والده .
عامر : أياك تخرجى من هنا ... إياك تيجي على هناك لغاية ما نشوف حل .
سيدال : مش هسيب والدى لوحده .
عامر (صرخ فيها وجرى) : بقولك خليكي هنا متشغلنيش .
دخلت سيدال وقفل عليها عامر لكن جواها نار ... عايزه تروح تطمن على والدها وأخوها .
المهاجير ؟! إيه اللى بيفكروا فيه وإيه اللى جرأهم لكده ؟!
بقالهم سنين كتير بره القرية أول مرة حد فيهم يجرؤا ويدخلها بالطريقة دى .
سنقر .... مفيش غيره هو السبب فى كل اللى بيحصل ده .
مقدرتش تصبر وتتحمل قلقها وبدون تفكير جرت ناحية بيتها .
.......
تالين : ياااه يا ماما ... سيدال ماسمعتش الكلام .
الأم : اه ... شوفتى يا توتا ... هل ده ينفع ؟
تالين : لأ طبعاً ... طيب كده الست الشريرة هتشوفها وتاخدها معاها بعد ما كانت فى أمان فى بيت عم جابر .
الأم : أمممم ... المفروض تاخدها معاها ... لكن هل سيدال هتوافق بسهولة تمشي معاها ولا تفتكرى إيه هيحصل ؟
تالين : ممكن تدافع عن نفسها مثلاً.
الأم : أحتمال وارد ... أو ممكن حد يدافع عنها .
تالين : حد زى مين ؟
الأم : هنعرف بكرة إن شاء الله علشان أنا مش فاضية دلوقت .
تالين : يووووه يا ماما ... أنا عايزه أعرف .
الأم: وأنا هحكيلك لكن مش دلوقت أن شاء الله.
تالين : طيب هما مش أخواتها فى الطريق ... تفتكرى هيلحقوها ؟ و إيه هيجرى لعمو الزعيم سلطان ؟
الأم : كل ده هتعرفيه بكرة إن شاء الله يا توتا .
متنساش ان الروايه موجوده كامله في قناه التليجرام
والواتساب
1- للانضمام لقناه الواتساب
( 👈اضغط هنا👉 )
꧁꧁꧁꧁꧂꧂꧂꧂
2- للانضمام لقناه التويتر
(👈 اضغط هنا👉)
꧁꧁١꧁꧁꧂꧂꧂
3- للانضمام لصفحه البيدج
(👈 اضغط هنا👉)
꧁꧁꧁꧁꧂꧂꧂
4- للانضمام لقناه اليوتيوب
(👈 اضغط هنا 👉)
꧁꧁꧁꧁꧂꧂꧂
5- يمكنك للانضمام لقناه التليجرام
( 👈اضغط هنا👉 )
꧁꧂ ꧁꧁꧁꧁꧂꧂
6- ويمكنك للانضمام لصفحه التيك توك
( 👈اضغط هنا 👉)
꧁꧂꧁꧁꧁꧂꧂꧂
7-وللانضمام لصفحه الانستجرام
(👈 اضغط هنا 👉)
꧁꧁꧁꧁꧂꧂꧂꧂
و للانضمام علي جروب الفيس بوك
(👈 انضمام 👉)
👆👆👆👆
📚 لقراءه الفصل التاني من هنا ♡♡♡👇👇
( الفصل الثالث)
✍️ لقراءه بوابة القدر كامله 👇
( 👈اضغط هنا👉 )
