روايه انت نصيبي وقسمتي الفصل السادس بقلم إسراء جمال
روايه انت نصيبي وقسمتي الفصل السادس بقلم إسراء جمال
روايه انت نصيبي وقسمتي
الفصل السادس
بقلم إسراء جمال
انت نصيبي وقسمتي/البارت السادس
(يووووم فرح حساااااام)
في بيت أميرة
أنتِ يا اللي تتنزغدي يا أميرة، اصحييييي
أميرة بفزع: في إيه يا ماما؟ في حد بيصحي بني آدم نايم بالطريقة دي؟
الأم: أعمل لك إيه؟ ليَّ ساعة بأصحي فيكِ وأنتِ ما بتصحيش. قومي يا أختي اغسلي وشك وحصليني عند خالتك أم حسام.
أميرة بغيظ: وليه بقى إن شاء الله؟ هأعمل إيه أنا هناك من النجمة كده؟
الأم: يا بت الست لوحدها ما عندهاش بنات يساعدوها، وهي بتعتبرك زي بنتها، أكيد محتاجانا معاها، ولا هي دي مش هتبقى أم عريس الغفلة؟ ولازم تساعديها عشان تحبك وترضى عن...
أميرة ببرود: طنطي فاطمة بتحبني من غير حاجة، مش محتاجة أروح أساعدها عشان تحبني.
الأم بنرفزة: طب قومي يلَّا تقوم قيامتك وحصليني ع هناك، وأما أشوف كلامي هيتسمع ولا لأ. وتركتها وخرجت من الغرفة.
أميرة بغيظ وهي قايمة من ع السرير: يووووه! كل حاجة أميرة أميرة! ما أعرفش أنا هأروح أعمل إيه معاهم، هيفضلوا يمشروا فيَّ ويهدوا في حيلي لحد ما نروح القاعة. هو فرح أسود على دماغ غادة إن شاء الله.
بعد ساعة في بيت حسام
ها يا طنط، عاوزة حاجة تاني أعملها لك؟
أها ونبي يا أميرة يا بنتي.
خدي طلعي الحاجة دي فوق في شقة حسام، بس حطيها في الثلاجة أحسن تبوظ.
أميرة بفرسة: حاضر يا طنط، هاتي.
وأخذت الحاجة وهي طالعة عمالة تبرطم:
خدي يا أميرة طلعي، ادخلي يا أميرة، شيلي! ومن الصبح هادين حيلي، تقولشي أنا اللي هتجوز!
منك لله يا غادة يا بنت أم غادة، اللهي ليلتك تكون سودة على دماغك يا بعيدة.
ودخلت الشقة تحط الحاجة اللي معاها في الثلاجة، ولسة ماشية لقت اللي بيتكلم من وراها: أنتِ بتعملي إيه هنا؟ ها؟
أميرة بفزع: هااااااااا! وطارت الحاجة اللي في إيديها وبهدلت الشقة كلها، والحاجة دي كانت عبارة عن علبة جاتوه.
حسام بفزع: نهار أهلك مش فايت يا أميرة! بهدلتي السجاد والريسبشن!
أميرة بزعيق: أنت يا بني آدم، أنت مش تكح ولا تتنحنح وأنت داخل؟ فزعتني الله يخرب بيتك!
حسام بغيظ منها: يا برودك يا شيخة! وكمان ليكِ عين تزعقي بعد اللي هببتيه ده!
أميرة ببرود: والله أنا ما ليش دعوة، أنت اللي دخلت زي القضا المستعجل وخلتني وقعت اللي في إيدي على الأرض.
حسام بندب: والعمل يا فيلسوفة عصرك؟ غادة لو شافت السجادة والأرض دي وهي كده النهاردة هتخليها ليلة طين على دماغي!
أميرة بسخرية: أحْيِيييه على الرجالة بقى! خايف لا العروسة تزعل! وطين عيشتك يا حس، بلا وكسة!
حسام بعبوس: ما أنتِ مش فاهمة، النهارده يوم ما ينفعش فيه نكد خالص، ولا باقي الأيام هتبقى دمار شامل.
أميرة بضحك: طيب طيب، أنت هتشرح لي تاريخ حياتك؟ إيدك معايا نلم السجادة نطلع ننضفها بره الشقة ونرجع نمسح لك الأرضية.
وبعدين نفرشها تاني ولا كأن حاجة حصلت.
حسام بغرور وهو يعدل من ياقة قميصه: تؤ تؤ! أنا العريس يا حلوة، يعني ما أعملش أي حاجة النهارده، وبما إنك أنتِ اللي بهدلتيها يبقى تنضفيها لوحدك. وضحك وسابها ومشي.
أميرة بغيظ وهي تضرب بقدميها الأرض: ماشي يا حسام، إن شاء الله يا رب غادة تطين عيشتك النهارده وتبات في الريسبشن المهبب ده.
في المساء في قاعة الزفاف
دلف حسام وعروسه غادة إلى القاعة وسط فرحة كبيرة من الأهل والأقارب، وتعالت أصوات الأغاني من حولهم. جلس حسام وغادة في الكوشة المخصصة لهم، بينما كانت أميرة شاردة فيهم وتتخيل نفسها وحبيبها أحمد مكانهم.
في ركن بعيد عن الجميع كانت تقف أميرة، التي تألقت بفستان من التل باللون الرصاصي النازل قطعة واحدة وذو ذيل طويل من الخلف مرصع من الصدر بألماس فضي اللون وحجاب من نفس لون الفستان وبعض خصلاتها خارجة منه.
وتزين وجهها ببعض مساحيق التجميل الخفيفة، حيث وضعت قليلًا من حمرة الشفاه وردية اللون وقليلًا من الكحل الأزرق الذي أعطى لعينيها جمالًا وسحرًا خاصًا.
جاء من خلفها أحمد وهمس في أذنها بحب: القمر بتاعي سرحان في إيه؟
التفتت له أميرة وأردفت ببسمة واسعة:
تفتكر في إيه مثلًا؟
أحمد بمكر وهو يغمز لها: اممم، أكيد فيَّ صح؟
أميرة ببسمة: صح يا حبيبي.
أحمد وهو يمسك يدها يقبلها بحب ويهمس أمامها: عقبالنا يا حبيبتي.
أميرة ببسمة خجلة: يا رب يا حبيبي.
أحمد بمرح: بقول لك إيه؟ ما تيجي نرخم على حسام ونرقص معاه هو والعروسة الرقصة السلو دي؟
أميرة بضحك: لا يا عم، كفاية اللي هيشوفه لما يروح.
أحمد بعدم فهم: اممم، هيشوف إيه؟
أميرة بسرعة وهي تدرك ما قالته: ها؟ لا أبدًا ولا حاجة.
وأثناء حديثهم ظهر أمامهم آخر شخص ممكن ييجيء على بال أحمد، ساندي.
ساندي بدلع وهي تمد بيدها لأحمد: هاي أحمد، مبروك، عقبالك.
أحمد وهو يمد يده لها: الله يبارك فيكِ يا ساندي.
ساندي بمكر وهي تنظر لأميرة: إيه يا أحمد، مش تعرفنا؟
أحمد بارتباك وهو يعرفهم ببعض: دي أميرة يا ساندي، جارتنا.
ودي ساندي زميلتي في الجامعة يا أميرة.
ساندي ببرود وهي تمد يدها لأميرة:
تشرفنا.
أميرة ببرود مماثل لها وتنظر لها بغضب: شكرًا، عن إذنكم هأروح أشوف ماما. وتركتهم ورحلت.
ساندي بمكر: مالها دي؟ أخذت في وشها ومشيت ليه؟
أحمد ببرود لساندي: عادي، ما تشغليش بالك.
خذي راحتك، الفرح فرحك. وتركها ورحل.
بعد الفرح ما خلص
دلف حسام وغادة إلى شقتهم.
حسام وهو يحمل غادة إلى غرفتهم.
غادة: حساااااام، استنى، نزلني.
حسام باستغراب: في إيه يا غادة؟
غادة بنرفزة: بقول لك نزلني يا حسام!
حسام: أهو يا ستي، أديني نزلتك.
غادة وهي تسير تجاه الأرض والسجاد الملطخ ببقع الجاتوه: إيه ده؟ إيه المنظر البشع ده؟
حسام بارتباك وهو ينظر تجاه الأرض: ها؟ ما أعرفش.
غادة بانفعال: والله؟ أومال مين اللي يعرف؟ يعني مين بهدل الشقة كده؟
حسام في نفسه: ماشي يا أميرة، أما أشوف خلقتك! عملتيها وسبتي الدنيا مبهدلة ومشيتي!
غادة بعصبية: ساكت ليه؟ ما تتكلم! مين بهدل السجادة والأرض وخلى الريسبشن بشع كده؟
حسام بهدوء: اهدي بس يا غادة، أكيد حد ما كانش يقصد.
غادة بانفعال: لا، اللي عامل كده يقصد، وأكيد أمك لأنها ما بتحبنيش وعاوزة تعكنن عليَّ.
حسام بانفعال: غادة، احترمي نفسك! قلت لك أكيد حد ما كانش يقصد، أمي هتعمل كده ليه؟ أنتِ اتهبلتي؟
وعدي ليلتك دي بقى، ما كانتش سجادة وأرضية اتوسخت يعني، أبقي نظفيها بكرة يا ستي.
غادة بانفعال أكبر: وأنا مش خدامة عندك لما تبوظوا لي الدنيا وأنا أنضفها وأنا لسة عروسة!
حسام بصوت واطي وهو يضغط على أسنانه: يعني أنتِ عاوزة إيه دلوقتي يا غادة؟
غادة: مش عاوزة حاجة. ودخلت أوضتها ورزعت الباب في وشه بكل قوتها.
وبعد خمس دقائق لقاها خارجة وجايبة له بيجامته ومخدة ولحاف وبتقول له: ابقى ادخل مع نفسك هنا بقى يا عريس. وسابته ودخلت أوضتها، بس المرادي قفلتها بالمفتاح.
حسام وبعد ما استوعب اللي حصل جري ناحية الأوضة وحاول يفتحها لقاها مقفولة. حسام وهو يجز على أسنانه: غااااادة افتحي يا غادة وخلي ليلتك تعدي. وبدأ يخبط على الباب وفضل كده نص ساعة يخبط وينادي على غادة، ولكن لا حياة لمن تنادي، غادة ما كانتش بترد عليه 😂.
حسام وهو يتمدد على أريكة الأنتريه:
منك لله يا أميرة! كان لازم يا أختي تتخضي وتوقعي اللي في إيدك؟ أديكِ خليتيها ليلة نكد وزعابيب من أولها!
آه يا ني يا ما كان نفسي أخش دنيا يا ما، بس شكلك ما دعتليش من قلبك. واتغطى وراح في النوم.
(خروبيتك يا أميرة، دعوتك رشقت والواد هيبات في الريسبشن بسببك😂😂).
"""""*
#انت_نصيبي_وقسمتي
#إسراء_جمال
