روايه صك الغفران الفصل الثامن عشر بقلم الكاتبه فريده الحلواني
روايه صك الغفران الفصل الثامن عشر بقلم الكاتبه فريده الحلواني
المعضلة في قلبي انا
هل سيمنحك ذاك الصك ...ام ان ذنوبك حولته إلى حجر صوان مهما هبط عليه من امطار لن يزهر ابدا
انا ....لن أسامحك و لن أعود لك
حتي لو ....قدمت الي آلاف الصكوك
جميع الفرص نفذت بداخلي و لا يوجد غير ....اني لا أراك من الاساس
اصبحت ماضي بغيض ادعو الله ان ينسيني اياه
لن اكرهك و لكن ....لم أعد احبك
هذا ما فكّرت به آسيا وهي ممددة فوق الفراش لا تقوى على الحراك...
لن تذهب إلى عملها اليوم... هي بحاجة إلى الراحة إلى إعادة ترتيب تلك الفوضى الصاخبة داخلها
ستختبئ في أحضان أطفالها... هناك فقط تستطيع أن تتنفس بعيدًا عنه... بعيدًا عن كل ما يربطها به
ستقوّي قلبها... ذلك القلب الذي بدأ أخيرًا يتذكر كمّ الوجع الذي عاشته بسببه
على عكس السابق... كانت ترفض التذكر تفرّ منه كأنه عدو
وتعيش فقط على فتات الذكريات الجميلة... كي تُقنع نفسها أن كل هذا العشق كان يستحق الانتظار
لكن الآن... لم يعد الهروب خيارًا
سحبت هاتفها ببطء كأن حتى هذه الحركة تُرهقها ثم اتصلت بشريف
وحين سمعت صوته قالت بنبرة هادئة تخفي ما بداخلها
صباح الخير...
أضافت بسرعة كأنها تخشى التراجع
أستاذ شريف من فضلك... عايزة آخد إجازة يومين
شعر بالقلق فورًا فسألها
مالِك يا آسيا... إنتِ تعبانة
أجيلك بدكتور
ابتسمت رغم ألمها... ابتسامة لا يراها أحد
لا أبدًا... أنا كويسة بس محتاجة أقعد مع ولادي شوية...
حاسة إني بقالي فترة مشغولة عنهم
ردّ عليها بحنو
براحتك طبعًا... أهم حاجة ترتاحي
أكمل بغيظ مازح
وربنا يقوّيني على المجنونة اللي اتبليت بيها دي
ضحكت بخفة ضحكة قصيرة لكنها صادقة هذه المرة
نهال دي أطيب حد ممكن تقابله في حياتك... بنت جدعة جدًا على فكرة
أنهت المكالمة بعد قليل ثم تحركت بكسل نحو الخارج لتوقظ أطفالها...
وكأنها تُجبر نفسها على الحياة من جديد
بعد قليل...
جلسوا معًا يتناولون الإفطار
راقبتهم بصمت... تحفظ تفاصيلهم في قلبها كأنها تخشى فقدانها
لكن انتباهها توقّف عند صهيب...
شروده... صمته... ذلك الثقل الغريب في عينيه
سألته برفق
مالك يا حبيبي... شكلك مضايق
رفع بصره إليها وقال بنبرة حاول أن يجعلها طبيعية... لكنها خرجت مكسورة
مفيش يا ماما... إنتِ عارفة الثانوية العامة بقى
تدخلت آيات محاولة التخفيف
الله يكون في عونك يا حبيبي... دي ابتلاء ولازم نمر بيه كلنا
قالت بسمة بحماس
ماما... آية طلبت مني نخرج شوية بعد الدرس ممكن
سألتها بهدوء
تخرجوا فين
ردّ صهيب بدلًا عنها
عايزين يتمشّوا شوية يا ماما... وأنا قولتلها هستأذنك وهكون معاهم من بعيد... متقلقيش كمان ياسين هيتمشي معايا عشان اخته
هزّت رأسها بتفهم ووافقت...
ظلوا يتحدثون قليلًا حتى غادرت الفتاتان
وساد الصمت...
لم يبقَ إلا هي... وصهيب
نظرت إليه طويلًا... ثم قالت بنبرة حانية
مالك يا حبيبي... ومتقولش المذاكرة... عشان إنت عارف إني بحس بيك
ارتسم الحزن بوضوح على ملامحه... لم يعد قادرًا على التمثيل
ثم قال... وكأن الكلمات تُنتزع منه
إنتِ كنتِ عارفة إن بابا... حرامي ومرتشي
تجمّدت ملامحها...
ليس لأن الحقيقة صادمة... بل لأن اللحظة التي كانت تخشاها وصلت
أكمل بصوت مكسور
ريان جاب ورق يثبت ده يا ماما... وعايز يحبسه...
أنا مش قادر أصدق...
صمتت لثوانٍ...
ثوانٍ كانت بداخلها حرب كاملة
ثم اقتربت منه ببطء جلست أمامه ورفعت وجهه بيد مرتعشة
قالت بهدوء مؤلم
وأنا... لو قولتلك إن ده حقيقي
اتسعت عينيه بصدمة
يعني إيه...يعني إنتِ كنتِ عارفة
أغمضت عينيها للحظة... وكأنها تستجمع شجاعة الاعتراف
عرفت متأخر... وبعد ما عرفت... حاولت أصدّق إنه غلط وعدّى...
حاولت أقنع نفسي إنه مش الشخص ده... عشانكم... وعشاني
هزّ رأسه بعنف والغضب بدأ يتسرّب إليه
بس هو كده فعلًا
كل اللي الناس بتقوله صح
نظرت إليه بصدق قاسٍ
أيوه... صح
ساد الصمت...
ثم نهض فجأة يتحرك في المكان بعصبية
يعني إحنا كنا عايشين مع واحد... واحد...
لم يكمل... كأن الكلمة تخنقه
اقتربت منه بسرعة
هو أبوك يا صهيب...
مهما عمل... هو أبوك
صرخ بغضب ممزوج بالألم
وأنا مش عايز يكون أبويا كده
انكسرت عيناها... لكنها تماسكت
وأنا كمان...
كنت أتمنى يكون غير كده
سقط على المقعد ودفن وجهه بين يديه
أنا حاسس إني اتخدعت...
كل حاجة طلعت كدب...
جلست بجانبه وضعت يدها على رأسه بحنان
مش كل حاجة يا حبيبي...
إحنا... مش كدب
رفع عينيه إليها بضعف
طب أعمل إيه دلوقت
تنهدت بعمق وقالت بهدوء
تقف...وتختار تكون غيره
سكتت لحظة... ثم أضافت
الغلط بتاعه مش هيتكتب عليك...
بس هيتحدد إنت هتعمل إيه بعد ما عرفته
نظر إليها طويلًا...
ثم اقترب منها فجأة... واحتضنها بقوة كأنه يتمسك بشيء ثابت في عالمه الذي انهار
أما هي...
فأغمضت عينيها...
واحتضنته أكثر...
كأنها تحاول حمايته...
من الحقيقة...
ومن أبيه...
ومن نفسه
فصل العناق ثم جلس على الأرض...
نظراته شاردة... لكن هذه المرة... لم تكن مكسورة فقط
كانت غاضبة
قال فجأة... بصوت هادئ بشكل مخيف
عارفة يا ماما...
نظرت له بقلق
إيه يا حبيبي
ابتسم... ابتسامة غريبة... لا تشبهه
أنا مش متفاجئ أوي
تجمّدت ملامحها
يعني إيه
رفع عينيه إليها... وفيها وجع قديم ليس وليد اللحظة
يعني... هو عمره ما كان كويس أصلًا
سكت لحظة... ثم أكمل بمرارة
فاكره لما كان بيزعقلي عشان جبت ٩٥
ويقولي ...إنت فاشل
انقبض قلبها... ولم تستطع الرد
فاكره لما كان يفضل يقارنّي بأي حد
أو لما كان يقول إن أنا ...مش قد اسمه
صوته بدأ يهتز... لكن الغضب كان أقوى
أنا كنت فاكر إن العيب فيا...
كنت فاكر إني قليل... إني مش كفاية...
نظر لها مباشرة...
ودموعه نزلت بصمت
طلع هو اللي قليل
صهيب...
قالتها بتحذير ضعيف... بين محاولة تهدئته... وخوفها مما بداخلها هي أيضًا
لكنه أكمل... وكأنه لم يسمعها
طول عمره بيكسرني...
وأنا... كنت بجري وراه عشان يرضى عني...
ضحك ضحكة مكسورة
يرضى عني إيه بس...
ثم فجأة صرخ
ده هو نفسه واحد وسخ
ارتجف جسده...
ليس فقط من الغضب... بل من سنين مكبوتة تخرج دفعه واحدة
اقتربت منه بسرعة
بصلي... بصلي يا صهيب...
لكنه لم ينظر
أنا كنت بخاف منه...
قالها بصوت منخفض جدًا
كنت أول ما أسمع صوته... قلبي يدق...
ثم رفع عينيه لها...
وكانت هذه أخطر لحظة
وأنا دلوقت... مش زعلان إنه ممكن يتحبس
سقطت الكلمات كالصاعقة...
هو نفسه اتفاجأ بها
أنا...
تلعثم
أنا حاسس إني... مرتاح
بدأ يتنفس بسرعة... وكأنه مذعور من نفسه
إيه ده....أنا إزاي أفكر كده...ده أبويا
وضعت آسيا يديها على وجهه تمسكه بثبات
اسمعني كويس...
أجبرته ينظر لها
اللي إنت حاسس بيه ده... طبيعي
هز رأسه برفض
لا مش طبيعي...أنا كده وحش
لااااا
قالتها بحزم
إنت مجروح... ومظلوم... واتأذيت سنين
سكتت لحظة... ثم أضافت بصدق
والراحة اللي حاسس بيها... دي مش عشان هو هيتأذي...
دي عشان يمكن... لأول مرة... تحس إن اللي ظلمك هيتحاسب
تجمّد...
كأن كلماتها وضعت اسمًا لإحساسه
دموعه نزلت أكثر...
أنا تعبت يا ماما...
قالها بصوت طفل صغير جدًا
كنت بحاول أبقى كويس... عشان بس يقولي...برافو
انهار تمامًا بين ذراعيها...
عمره ما قالها...
ضمّته بقوة... هذه المرة وهي تبكي أيضًا
أنا بقولهالك...
برافو يا صهيب...
إنت كويس... أحسن منه كمان
تشبث بها... وكأنها آخر أمان لديه
أنا مش عايز أبقى زيه...
حتى في دماغي...
ربّتت على رأسه بحنان
وإنت مش هتبقى زيه...
لأنك شايف غلطه... ورافضه
سكت لحظة...
ثم قال بصوت متعب... لكن أوضح..
أنا مش هسامحه دلوقت..
يمكن... مش هسامحه خالص
أغمضت عينيها... لكنها لم تعترض
فقط قالت...
حقك
ثم أضافت بهدوء
بس أهم حاجة... متكرهش نفسك بسببه
تنفس بعمق...
وكأن الحمل... لم يختفِ... لكنه أصبح مفهومًا
بعد قليل
أمسكت آسيا هاتفها واتصلت بريان
وما إن رد حتى قالت بحسم
ريان تعالي حالا انت واخواتك
سألها بتوجس
في ايه يا خالتي انتو كويسين
ردت عليه بقوة وغضب مكتوم
لما تيجي هتعرف يا بيه نص ساعة وتكونوا قدامي
وفقط.....أغلقت الهاتف دون أن تنتظر رده
بعد أقل من ساعة
كان الثلاثة يجلسون أمامها
في حالة تأهب واضحة
ينظرون لها بترقب
أما هي...فكانت تجلس أمامهم صلبة لكن عينيها مشتعلة
سألتهم بصوت حاد
ازاي تجيبوا ورق على اسلام و متقولوليش
يعني ايه عايزين تحبسوا أبو ولادي من غير حتى ما تاخدوا رأيي
انتو اتجننتوا ولا ايه
تحدث محمود محاولًا تهدئتها
اهدي بس يا آسيا أكيد مكناش هنعمل كده من وراكي
أكمل محمد بسرعة
ريان لسه جايب الورق أصلا ومفيش حاجة حصلت
أما ريان...فضيّق عينيه وهو ينظر لها بتركيز
وسألها بنبرة فيها شيء من الشك
هو انتي ايه اللي مزعلك كده
هو فارق معاكي للدرجة دي
نظرت له بغضب مشتعل
ثم قالت بحدة
يفرق ايه يا غبي
تبادلوا النظرات بعدم فهم
فأكملت بصوت أقل ارتفاعًا
لكنه أكثر قسوة وصدق
اللي فارق معايا ولادي
مستقبلهم هيتدمر لو أبوهم اتحبس
أشارت بيدها بعصبية
افرض صهيب اشتغل في مكان مهم
هينفع وأبوه محبوس
افرض حب واحدة بنت ناس
هيقبلوا بيه وأبوه رد سجون
سكتت لحظة
ثم اقتربت بجسدها للأمام
وعينيها مثبتة في ريان
انت شايفها عدالة
وانا شايفاها حكم إعدام على ولادي
اشتد جسد ريان ورد بحدة
واللي عمله اسلام ده ايه
ده مش إعدام لناس تانية
ردت عليه بسرعة
وانا مالي بالناس التانية
انا مليش دعوه غير بولادي
قال محمد بهدوء حذر
بس يا آسيا الغلط ده كبير
ومش هينفع نسكت عليه
رفعت صوتها فجأة
وانا مقولتش نسكت
انا بقول تفكروا...تفكروا بعقل مش بس بالقانون
نظر لها ريان بتركيز أعمق
وقال ببطء
يعني عايزة ايه...اسيبه
نظرت له بثبات
عايزة تحموا ولادي
قبل ما تبقوا أبطال على حسابهم
اتسعت عيناه قليلًا
وشيء داخله بدأ يتحرك
انا مش بعمل بطولة
انا بعمل الصح....ابن الكلب ده غير انه ماصص دم الناس و خارب بيوتهم
مش هيسيبك في حالك يا اسيا ...هيفضل يطاردك و يهدد فيكي
مش هتعرفي تعيشي انتي و ولادك غير لو غار في ستين داهيه
ضحكت بسخرية موجعة
الصح....الصح ده بيكسر عيالي يا ريان
انت مشوفتش صهيب كانت حالته ايه و هو بيكلمني من شويه. ... ابني بيضيع مني
شعر وكأن الأرض سحبت من تحته
هو عمل ايه لما حكالك
سألها بصوت منخفض
نظرت له بعمق
ثم قالت...
انهار...بس مش زي ما انت متخيل
سكتت لحظة
ثم أضافت ببطء
هو مش زعلان على أبوه
هو زعلان على نفسه
انقبض قلب ريان
بيقول انه كان بيجري طول عمره ورا واحد عمره ما كان يستاهل
وبيقول انه مش عايز يبقى زيه
خفض ريان نظره
أما آسيا
فأكملت وهي تضغط على كل كلمة
بس عارف ايه اللي كسره بجد
انه شايفك انت السبب في اللي جاي
رفع رأسه بسرعة
انا
ايوه انت
شايفك انت اللي هتحبسه
انت اللي هتفضحه
انت اللي هتخليه يبقى ابن واحد مسجون
سادت لحظة صمت ثقيلة
ثم قالت بهدوء قاسِ
انا مش بدافع عن اسلام
انا بدافع عن ولادي
اقتربت أكثر
وصوتها انخفض
لو عندك حل يحقق الاتنين قول..انما لو مفيش يبقى تختار
نظر لها ريان ولأول مرة
لم يكن واثقًا
اختار ايه؟
قالها بصوت خافت
نظرت له مباشرة
بين الحق...وبين دمك
سكت الجميع
أما ريان....فكان واقفًا في المنتصف لا هو قادر علي ترك هذا الحقير حرا يذيد في ظلمه و تجبره
و لا هو قادر علي أن يكون السبب في تدمير صهيب الذي يعتبره أخاه الصغير
داخل المدرسه....كانت تجلس بسمه جانب صديقتها تنظر لها بحزن و هي تراها تبكي بانهيار دون ان تستطع التفوه بحرف
بكت اسيا بحزن وانكسار بسبب ما حدث لها منذ قليل داخل مرحاض المدرسة
كانت دموعها تنساب في صمت متقطع كأنها تحاول أن تستوعب ما جرى أكثر مما تبكيه... جلست بجوارها بسمة تضع يدها على كتفها بحنان تحاول تهدئتها وفهم ما حدث بينما القلق يتسلل إلى ملامحها شيئًا فشيئًا
ترددت آسيا طويلًا وكأن الكلمات تخونها ثم قالت بصوت مرتجف اختلط فيه الخوف بالاشمئزاز
مش عارفة أقولك إيه يا بسمة... علياء بقالها فترة مركزة معايا بشكل غريب ومن يومين لاحظت إن كل ما أدخل الحمّام تدخل ورايا
توقفت لحظة... ابتلعت ريقها بصعوبة وكأن مجرد استعادة الذكرى يعيد إليها الشعور ذاته ثم أكملت بصوتٍ خافت
النهارده... فتحت عليا الباب فجأة... ولما زعقت فيها فضلت تبصلي بنظرات غريبة... نظرات خوفتني... وبعدها لمستني بطريقة مقرفة... حسّيت إني اتجمّدت ومش قادرة أتحرك
اتسعت عينا بسمة بصدمة وشهقت بفزع بعدما فهمت ما تعنيه صديقتها....تلك الحقيره تتحرش بها.....اشتعل الغضب داخلها فاختلط خوفها عليها برغبة حادة في حمايتها وقالت بحزمٍ واضح
لازم تقولي لمامتك يا آسيا اللي حصل ده مش هزار و لا حاجه هينه ...مينفعش تسكتي لازم تشتكي للمديره فورًا عشان الموضوع يقف عند حدّه
انخفضت نظرات آسيا وقد بدا عليها صراع داخلي مرير بين خوفها من الفضيحة وشعورها العميق بالانتهاك وبين حاجتها لأن يصدقها أحد ويحميها من تكرار تلك اللحظة التي سرقت منها إحساس الأمان
ظلّت صامتة لثوانٍ طويلة بعد كلمات صديقتها تحدق في الأرض وكأنها تخشى رفع عينيها.... كانت أصابعها ترتجف فوق حجرها تضمّ كفيها بقوة كأنها تحاول محو الإحساس الذي ما زال عالقًا بجلدها
قالت بصوتٍ خافت بالكاد يُسمع
أنا... أنا خايفة يا بسمة
رفعت رأسها ببطء....بدت عيناها ممتلئتين بدموعٍ جديدة لكن هذه المرة لم تكن دموع حزن فقط بل ارتباك وعجز
حسّيت إني غلطانة... مش عارفة ليه... كأنّي أنا السبب فضلت طول الوقت أسأل نفسي...يمكن أنا فهمت غلط يمكن كنت مبالغة
هزّت بسمة رأسها بسرعة لكنها تركتها تكمل مدركة أن صديقتها تحتاج أن تُخرج ما بداخلها أولًا
تنفست بعمقٍ متقطع ثم اكملت ....
لما لمستني... جسمي كله اتخشّب كنت عايزة أزعق أو أزقّها... بس صوتي اختفى حسّيت إني صغيرة أوي... وضعيفة أوي... وكأن المكان كله قفل عليّا
سقطت دمعة ساخنة على يدها فمسحتها بسرعة وكأنها تخجل حتى من بكائها
بعد ما خرجت فضلت أغسل إيدي كتير... اوي... لدرجة إنها وجعتني بس الإحساس
ماراحش... لسه حاسة بيه
و المشكله الأكبر إن ماما مش مصحباني و لا قريبه مني بشكل كفايه يخليني احكيلها حاجه زي دي
اقتربت بسمة منها أكثر وأحاطت كتفيها بذراعها فمالت الأخري عليها دون مقاومة كأنها أخيرًا سمحت لنفسها أن تستند إلى أحد
همست بسمة بهدوء
اللي حصل ده مش ذنبك... ولا غلطك اللي عملته هي غلط... وانتي لازم تحمي نفسك بأي شكل
انا هقول لماما و اكيد هتلاقي حل يحميكي متقلقيش
أغمضت عينيها وكأن الكلمات بدأت تخترق جدار الخوف داخلها لكنها ما زالت مترددة
طب لو محدّش صدقني... لو قالوا إني بكبّر الموضوع... أنا مش مستحملة إن حد يبصلي بطريقة وحشة
ساد صمت قصير لم يُكسره سوى صوت أنفاسها المرتبكة
ثم قالت لأول مرة بنبرة تحمل شيئًا من القرار رغم ارتجافها
بس... أنا مش عايزة أشوفها تاني... مش قادرة أدخل الحمّام وأنا خايفة
شدّت بسمة على يدها قائلة بثقة
عشان كده لازم نتكلم وأنا هكون معاكي... خطوة بخطوة
رفعت آسيا رأسها ببطء وفي عينيها لمعة ضعيفة تشبه بداية الشجاعة تلك الشجاعة التي لا تولد من القوة بل من الألم حين يصل إلى حدٍ لا يمكن السكوت عليه
داخل الشركة... وخصوصًا مكتب آدم كان يشعر بغليان داخل صدره
كل الأسئلة التي لم تُطرح بعد كانت تصطك في عقله
لماذا لم تأتِ اليوم... أين ذهبت... ومع من
لم يقوَ على تحمل كل تلك الأسئلة دفعة واحدة فاستدعى نهال سريعًا
وحين وقفت أمامه نظر إليها بعينين مشتعلة بالغضب
آسيا فين... مجتش لحد دلوقت ليه
ابتسمت نهال بخفة فاكمل
هي فاكرة نفسها شغالة في طابونة ولا إيه
إجازة
قالتها بتحدٍ وبرود جعله يضيق عينيه كما لو لم يفهم معنى الكلمة
أضافت بتشفٍ واضح
اتصلت بأستاذ شريف وطلبت منه إجازة يومين...
فين المشكلة يا أستاذ آدم
التفت نحوها قلبه ينقبض خوفًا عليها لكنه لم يستطع أن يظهر ذلك
كبرياؤه... هذا الكبرياء الذي لطالما كان يعتلي رأسه منعه أن يسأل تلك البغيضة كما يسميها دائمًا
ظل ينظر لها بعينين تختلط فيهما الغضب والخوف فوجدها تقول بشماتة
محتاج مني حاجة... آه... أحمد الشيمي جاي كمان يومين...
وأكيد هتكون رجعت من الإجازة...
ابتسمت نهال ببرود أكثر وكأنها تراقب نار الغيرة تتصاعد بداخله
حبيت أطمنك بس... أحسن تكون قلقان إن الشغل يتعطل لما يوصل... بعد إذنك
غادرت سريعًا تاركة وراءها مكتبًا متفجرًا بصمت قاتل
أما هو... فظل واقفًا وجهه مشتعِل عينيه تحرق المكان
يا بنت الكلب
تمتمها بصوت مبحوح كل حرف فيها يحرقه من الداخل
الغيرة السوداوية الحقد الممزوج بالخوف، كل شيء مختلط بداخله
نظر حوله للحظة وكأنه يتنفس الصمت
ثم عاد لينظر للطاولة... يلمس أي شيء بيد مرتجفة
شعر بوخزة من الغيرة... الغيرة التي كانت دائمًا تتسلل إلى قلبه وتبقيه أسيرًا لنفسه
في داخله... شعور قاتل بالغِل يزداد
كل شيء تحرك... كل شيء خارج عن سيطرته
كل ثانية يبعدها عن سيطرته... كل مرة تبتسم فيها... كل كلمة توجهها لغيره
يوقظه شعور خفي... عميق... أنه خائف من فقدانها... وأن هذا الخوف يمكن أن يسيطر عليه يحرق عقله يجعل قلبه أسود
كانت الغيرة عنده ليست مجرد شعور عادي...
كانت رعبًا من فقدان القوة من فقدان السيطرة من الاعتراف بأن قلبه اصبح غير قادر على امتلاكها حقًا
كلما تحركت خطوة في حياتها كلما ابتعدت كلما شعر أنه يهدم نفسه بنفسه
في لحظة.... كاد يقفز خلفها يصرخ يطالب يملكها... لكنه عرف أن هذا لن يمنحه سوى مزيد من الألم
جلس يلهث بصمت وعيونه تحرق الهواء من حوله وكأن الظلام بداخله يمتد ليبتلع كل شيء
كان يحدق في الفراغ
العالم كله يبدو ساكنًا من حوله لكنه كان يسمع صخب داخله كأنه أعاصير
كل ثانية تمر بدون كلمة منها تزيد النار في صدره
كل خطوة لم يسمع عنها تزيد الغضب تزيد الغيرة تزيد السواد في قلبه
تذكر كلمة نهال
اتصلت بأستاذ شريف وطلبت منه إجازة يومين
عاد الصوت داخل رأسه كالصاعقة
يومين بس... يومين دون أن تخبره
يومين... كل شيء يتحرك من غير سيطرته... وكل شيء بداخله يغلي
اقترب من مكتبه قبض على الطاولة حتى تكاد أصابعه تنكسر و ظل يهزي
يومين... بس يومين... بس يومين...
تمتمها كصرخة صوته يهتز
كل ثانية بدون ما أرى... كل ثانية تبعدها... كل ثانية...
كل شيء داخلي... أسود... أسود... أسود...
قفز من مقعده بدأ يمشي بسرعة داخل المكتب
يدور حول نفسه كأن الغرفة ضاقت عليه
أنا... أنا... أنا خايف...
خايف أفقد السيطرة...
خايف أفقدها...
خايف قلبي يتحول لسواد هياذيها
صمت للحظة ثم ضرب الطاولة مرة أخرى
يومين بس... يومين بس... تكفي لتدميري
ظل واقفًا رأسه بين يديه عيون مشتعلة راسه مليء بأفكار سوداوية
تخيل كل السيناريوهات الممكنة
لو ابتعدت أكثر...لو ضحكت مع أحد
لو رأت شيء... ولم تكن تحسب حسابه
تخيل قلبه ينفطر
أنا... مش قادر اسيطر على نفسي...
كل ثانية بتمر بتزيد السواد جوايا... بتزيد من جنوني...
جلس مرة أخرى تنفسه متقطع يده ترتجف على حافة الطاولة
أنا... أنا... مش قادر...مش قادر أتحكم في أي حاجة...
اصبح الهواء حوله بدا ثقيلاً
حتى المكتب أصبح كئيبًا
كل شيء داخله صار حجرة مظلمة كل شعور مختلط
غيرة.. خوف..غضب كبرياء محطم هوس.. ألم وسواد داخلي يلتهمه
عرف في تلك اللحظة شيئًا واحدًا
لو تحركت خطوة... لو ابتعدت ثانية... لو أخطأت...
سيأخذ كل شيء منه
وكل شيء... داخله... سيصبح أكثر سوادًا أكثر جنونًا أكثر ألمًا
جلس صامتًا لا يستطيع الصراخ أكثر
آسيا لم تتحدث لم ترد...
وبالرغم من ذلك كان صوتها في رأسه
كل دقيقه تمر في غيابها كانت تضاعف من سواد قلبه وتجعله يختنق من الغيرة المطلقة والخوف من الفقدان
وفي المكتب المجاور له... كان يقف كل من
معاذ وقاسم إلى جانب شريف وأمير الذي علم بطلب الاول لابنته الصغرى
ظهر الغضب جليًا على ملامح أمير وقال بحزم
معنديش بنات للجواز
ارتسمت الصدمة على وجهي الأخوين وارتعش معاذ بجنون
ليه يا عمو... أنا فيا إيه غلط عشان ترفض
أنا بحب بنتك من سنتين وكنت مستني تخلص جامعتها عشان أتقدملها
أنا ماحاولتش أقرب منها ولا حتى ألمحلها
برغم رعبي كل ثانية إنها تحب غيري أو واحد تاني ياخدها مني
قولي إيه سبب الرفض ومهما كان أنا هصلحه
نظر له أمير بحزن لكنه قال ببرود مختلط بشفقة
اسأل عمك... أنا مش هعيد الماضي تاني
ولم يضيف أكثر من ذلك ...تركهم وغادر سريعًا
رغم شفقته على الشاب العاشق إلا أنه لن يسمح له بجرح ابنته كما فعل عمه منذ زمن
جز قاسم على أسنانه بغل شديد بينما تنهد شريف بهم محاولًا تهدئة الغضب بداخله
وفي المنتصف... كان معاذ يغلي من شدة الغضب صوته يرتجف
أنا مش فاهم حاجة... إيه اللي دخل آدم... أسأله عن إيه
أنا بحبها... مش هقدر أتحمل رفضه... أنا هتجنن
رفع قاسم قبضته وكاد أن ينفجر...
كله بسبب عمك و غباؤه... دمر نفسه و هيدمرنا معاه
بدأ معاذ يتحرك داخل المكتب كل خطوة تضيف شدة على جنونه
أنا مش هسمح لحاجة توقفني... مش هسيبها ... حتى لو... حتى لو العالم كله ضدي
حاول شريف تهدئته صوته حاد لكنه منطقي
اهدي يابني و كل حاجه ليها حل باذن الله
تنهد قاسم بمرارة صوته منخفض
احنا دلوقت قدام جدار...جدار اسمه الماضي...وجدار اسمه آدم...
وكلنا محبوسين بين الحب والقسوة
ارتجف معاذ... ضرب الطاولة بقبضته الهواء في الغرفة يشتعل بغضبه
أنا بحبها...لا أي حد... ولا أي قرار... هيقف قدام قلبي
حاول شريف مرة أخرى بحذر
اقعد مع ابوك و خليه يحكيلك اللي حصل زمان
وقتها هتفهم و هتعذر امير
جلست حبيبة بين أمها وأختها تغلي كالمرجل
لم يتصل بها منذ أن تركت له المنزل
لم يحاول إرضاءها كما كان يفعل في السابق
اشتعلت النار داخل صدرها كلما تذكرت كلمات آسيا القوية التي أعلنت انتصارها رغم مرور عشرين عامًا
قالت الأم بتعقل محاولة تهدئة الوضع
تبقي غبية لو سبتيه ليها... أول مرة تبقي غلطانة يا حبيبة
مكنش ينفع تسيبي بيتك المرة دي
تدخلت نجوى في الحديث قائلة
كل الرجالة كده يا حبيبتي... المهم إنك إنتي اللي مراته وأم ولاده
هيلف يلف ويرجعلك
تطلعت لها حبيبة بجنون عينان مشتعلة بالغضب
إنتي فاكراه زي جوزك... بيعرف الستات بمزاجه
دي آسيا... فاهمة يعني إيه
لم تستطع حبيبة أن تهدأ قلبها يغلي من الخذلان والخيبة
كان هناك شعور داخلي بأنها محاصرة بين حبها القديم كبريائها وغضبها المكتوم
ردت عليها نجوي ببرود
اسيا و لا غيرها ....انتي اللي بايدك تحافظي علي بيتك و جوزك ...انا من رأي ترجعي و تحاولي تكسبيه عشان متخدهوش منك يا خايبه
كانت تجلس في منزلها وحيدة بعد أن أنهت تحضير الطعام تنتظر عودة أولادها من الخارج
أخذت تنظر إلى الساعة بين الحين والآخر... قلبها يخفق بشدة لكن شعورًا غريبًا من الهدوء المتوتر يحيط بها
فجأة صدح هاتفها برسالة من أحمد الشيمي...
صباحو عسل
قطبت جبينها بدهشة لم تكن تتوقع هذه الرسالة لكن قبل أن ترد وجدته يرسل رسالة أخرى
انتي كويسة... طمنيني عليكي
اشتدت ملامحها بدهشة لكنها شعرت بموجة غريبة من الدفء والاهتمام وكتبت بجديّة واضحة بين حروفها
الحمد لله يا فندم بخير
ابتسم على الطرف الآخر بهدوء ثم كتب
يا رب ديما
المهم أنا عارف إنك في إجازة... بس محتاج منك شغل مهم لازم تكوني في الشركة بكرة عشان تعمليه
أجابت آسيا بحزم رغم الخفقان الذي بدأ يسري في صدرها
تحت أمرك يا فندم بإذن الله هكون موجودة بكرة
كتب آخر جمله مبتسمًا
و تكوني بخير... أهم حاجة
أغلق الهاتف دون أن يضيف حرفًا آخر
جلست للحظة الهاتف لا يزال في يدها عينها تحدق في الشاشة
لم تشعر بمثل هذا الاهتمام منذ زمن طويل
ابتسمت ابتسامة خافتة لم تنطق بكلمة لكنها شعرت بموجة راحة غريبة تملأ صدرها
قلبها الذي اعتادت أن يكون متيبسًا من الخيبة بدأ يخفق بسرعة أقل كما لو أن شعورًا جديدًا بالتقدير والاهتمام بدأ يتسلل إليه
شعرت لأول مرة منذ سنوات أنها محط اهتمام حقيقي شخص يهتم لأمرها بلا ضغط أو طلب
ماذا سيحدث ياتري.....
انتظروووني
بقلمي/فريده الحلواني
