نوفيلا التعلب الفصل الاول بقلم الكاتبه فريده الحلواني
نوفيلا التعلب الفصل الاول بقلم الكاتبه فريده الحلواني
الفصل الأول
صباحك بيضحك يا قلب فريده
انطفأت آخر أضواء الفرح في حديقة الفيلا السكندرية وبقيت الزينة معلقة على الأشجار كأنها لا تريد أن تعترف بأن الليلة انتهت كان صوت الموج يتسلل بين الضحكات الأخيرة للمدعوين وهم يغادرون
واحدًا تلو الآخر حتى لم يبقي في المكان سوى العائلة
وقف ياسر عند باب الفيلا ممسكًا بيد جودي وكأنه يخشى أن تفلت منه بعد كل ما مرا به كانت ترتدي فستانها الرائع الذي أرهقها طوال الليل لكن عينيها كانتا تلمعان بفرح لم تعرفه منذ زمن بعيد
اقترب منهما سفيان يربت على كتف ابنته ثم التفت إلى ياسر قائلًا:
- يلا يا ياسر العربية برة هتوصلوا البيت وتريحوا... انت هتبات عندي النهارده
ارتفع صوت حسن من خلفهم حاسم لا يقبل النقاش:
- بيت إيه وعربية إيه محدش خارج من هنا الليلة دي
التفت الجميع إليه بدهشة فاقترب وهو يبتسم تلك الابتسامة التي يعرفها أهل البيت جيدًا ابتسامة الرجل الذي قرر ولن يتراجع:
- الفيلا هنا فيها أوضة متجهزة من امبارح
غالية فضلت تفرش فيها لحد الفجر عايزين تكسفوها.
نظرت غالية إلى زوجها بعتاب مصطنع ثم قالت لجودي بحنان:
- والله يا حبيبتي ما تعبت أنا بس حبيت أول ليلة ليكم تبقى وسطنا
احنا تعبنا من كل اللي حصل وربنا كتبلنا نفرح خلينا نفرح سوا
فقولت تخليكم معانا النهارده زي معاذ و سيلا
حاول سالم الشريف أن يتدخل وهو ينظر إلى ياسر:
- يا حسن الولد له بيته و...
قاطعه حسن وهو يرفع يده:
- يا سالم أنا مش برخّم عليكم... عارف إن اخواته لسه مشبعتش منه
بس عايزه الليلة دي هنا بكرة خده وروح بيه آخر الدنيا
مال عليه و همس في أذنه بوقاحة:
- أبوها مش هيرضى يخليها تبات معاه عندكم أو في شقته
والواد طلع ميتين أهله يا جدع خليه يفرح ويعوض اللي شافه
ضحكت سمر وهي تلكز زوجها بخفة:
- خلاص يا حبيبي سيبهم الراجل عنده حق
استسلم سالم ضاحكًا ورفع يديه علامة الهزيمة أما سفيان فهز رأسه مبتسمًا وقد فهم أن الأمر ليس إلا محبة خالصة لا تقبل الرفض.
في تلك اللحظة اقتحم المشهد صوت لا يمكن أن يخطئه أحد:
- طب وأنا محدش سألني أنا رأيي إيه؟
التفت الجميع إلى فهد الذي كان يقف بجوار طاولة الطعام ممسكًا بطبق مُمتلئ عن آخره وفي فمه قطعة من الحلوى لم يُكمل مضغها
قالت سما وهي تكتم ضحكتها:
- انت رأيك يفرق في إيه يا فهد؟
ابتلع ما في فمه بصعوبة ثم قال بجدية مبالغ فيها:
- يفرق في الأكل يا مدام لو العرسان باتوا هنا
يبقى الفطار بكرة هنا والفطار هنا يعني غالية
هتعمل فطير والفطير يعني أنا بايت هنا كمان بس محدش عزمني
انفجر الجميع ضاحكين وقالت غالية:
- يا واد انت بايت هنا من غير ما حد يعزمك من أول ما جيت إسكندرية
- ده تشريف ليكم يا غالية فيه ناس بتدفع فلوس عشان أبات عندهم
قال آسر ساخرًا وهو يجلس على حافة المقعد:
- مين دول اللي بيدفعوا...! محلات الشاورما؟
التفت إليه فهد وقد وضع يده على صدره متأثرًا:
- متجيبش سيرة الشاورما في ليلة زي دي أنا عندي مشاعر
قبل أن يرُد اخيه كانت غالية قد التفتت إليه بحدة:
- وانت مالك بيه أصلا كل حاجة لازم تتدخل فيها
- أنا عملت إيه دلوقتي؟!
- ولا حاجة بس قوم
اقترب فهد من ياسر وجودي وضع ذراعه على كتف ياسر قال بصوت منخفض كأنه يكشف سرًا خطير:
- بُص يا ياسر أختي دي أمانة لو زعلتها
أنا مش هعمل حاجة هاكل أكلك بس
ضحك ياسر وهو يدفعه بعيدًا:
- امشي يا فهد الله يخليك
- بقولك إيه لو صحيتوا بالليل جعانين متصحونيش
أنا هكون خلّصت الأكل كله
أشار الي مكان أسفل شجرة ثم أكمل بجدية:
- شايف الصينية دي... لميت فيها كل الحمام اللي
اتبقى وهقعد أئزئز فيه لحد الصبح
احمرّت وجنتا جودي وضربت أخاها في كتفه بقوة:
- يا فهد بقى بطل رخامة
- خلاص خلاص أنا ماشي بس افتكري إني حذرتك
ابتعد وهو يلتقط قطعة أخرى من الحلوى في طريقه.
صعد ياسر بجودي إلى الأعلى وسط الزغاريد التي أطلقتها ضي فجأة دون مقدمات فارتفعت معها ضحكات الجميع و عند منتصف الدرج توقف ياسر نظر إلى جودي نظرة جعلتها تخفض عينيها خجلًا همس بصوت
لا يسمعه سواها:
- عارفة أنا استنيت اللحظة دي قد إيه؟
- ياسر الناس تحت
- وفيها إيه... انتي مراتي
مال عليها يطبع قُبلة على جبينها ثم انحنى فجأة وحملها بين ذراعيه فشهقت وتعلقت برقبته بينما ارتفعت من الأسفل الصيحات وصوت فهد يعلو فوق الجميع:
- براحة على البضاعة يا ياسر عشان مفيش مُرتجع.
في الأسفل كانت سما تقف بجوار النافذة الكبيرة تتابع أخاها وهو يختفي في أعلى الدرج حاملًا عروسه لم تكن تضحك مثل الآخرين بل كانت تبتسم ابتسامة هادئة تحمل في طياتها شئ أعمق من الفرح
شئ يشبه الإمتنان
كانت عيناها تلمعان بدموع لم تسقط بعد
اقتربت منها ضي ووقفت بجوارها ثم أسندت رأسها على كتف أختها وقالت بصوت خافت:
- لسه مش مصدقة... صح؟
هزت سما رأسها دون أن تتحدث
فلم يكن قلبها قد استوعب بعد أن ياسر هنا أنه عاد أنه يضحك ويحمل عروسه ويعيش
عادت بها الذاكرة إلى ذلك اليوم
فلاش باك
----------
كان الصباح هادئًا على غير عادة والبيت ساكن كأنه يحبس أنفاسه جلست سما في الصالة الكبيرة لفيلا الشريف تمسك بكوب شاي برد منذ ساعة دون أن تشرب منه رشفة واحدة وكانت ضي تجلس قبالتها تفرك يديها بتوتر بينما يقف عدي عند النافذة يراقب الطريق
قالت ضي للمرة العاشرة:
- هو قال الساعة كام بالظبط؟
أجابها عدي دون أن يلتفت:
- قال جاي يا ضي... اهدي
- أهدى إزاي ده بقاله...
لم تكمل فقد اختنقت الكلمات في حلقها ثم دوى صوت سيارة تتوقف أمام البوابة
انتفضت سما واقفة سقط الكوب من يدها فتحطم على الأرض ولم تنتبه ركضت نحو الباب وضي خلفها وكأن الأرض تطير تحت أقدامهما
انفتح باب السيارة ونزل منه ياسر
كان أضخم مما تذكره كان على وجهه أثر تعب لكنه كان ياسر أخاها بعينيه اللتين تشبهان عينيها وابتسامته التي ظنت أنها لن تراها مرة أخرى
توقفت سما على بعد خطوات منه لم تستطع أن تتقدم كأن جسدها خاف أن يكون حلم فإذا لمسته تبخر قال ياسر بصوت مبحوح:
- إيه يا سما... مش هتسلمي عليا؟!
كانت تلك الجملة كافية ألقت بنفسها في حضنه وانفجرت في بكاء لم تبكه منذ سنوات بكاء كل الليالي التي قضتها تنتظر خبر... كل المرات التي رن فيها الهاتف فارتعد قلبها... والدعوات التي رفعتها في جوف الليل.
وصلت ضي فلم تجد مكان فاحتضنتهما معا وهي تشهق بإسمه مرة بعد مرة
- ياسر... ياسر... ياسر
ضمهما ياسر إلى صدره بكل ما فيه من قوة أغمض عينيه وقد سالت دموعه هو الآخر وقال:
- خلاص... خلاص أنا هنا محدش هيفرّقنا تاني
رفعت سما وجهها إليه أمسكت وجهه بين كفيها تتفحصه كأنها تتأكد أنه هو:
- انت كويس...؟ حد عملك حاجة...؟ وريني
ضحك ياسر من بين دموعه:
- أنا كويس يا سما... والله كويس
- كداب... انت خاسس
- عشان محدش كان بيأكلني محشي زيك
ضربته على صدره ضربة ضعيفة ثم عادت تحتضنه من جديد
من خلفهم كان عدي يقف صامت يمسح عينيه بظهر يده ويحاول أن يبدو متماسك
اما ذلك المُختل فقد وصل الي ذروة غضبه بسبب غيرته الحارقة
لم يستطع أن يتحمل أكثر من ذلك تقدّم منهم وسحب صغيرته بقوة
لم يهتم بشهقتها بل لف ذراعه حول خصرها بتملك وقال بجنون:
- خلاص بقى كفاية أهو زي القرد أهو
ردت من بين دموعها بحزن:
- ده أخويا يا تميم وكان هيموت من غير ما أشوفه
رد عليها بهوس :
- لو فضل حاضنك كده أنا اللي هقتله
هز ياسر رأسه بيأس... وحين التقت عيناه بعيني بعدي تقدم مد يده ليصافحه
لكن ياسر جذبه إلى حضنه هو الآخر قال عدي بصوت متحشرج:
- حمد الله على السلامة يا صاحبي البيت كان ناقصك
من الشرفة العلوية كانت سمر تراقب المشهد ودموعها تنهمر بينما وقف سالم بجوارها صامت يضع يده على كتفها ويهمس:
- الحمد لله يا بابا الحمد لله.
عادت سما من ذكرياتها على يد ضي تضغط على يدها برفق:
- روحتي فين؟
مسحت سما دمعة هاربة وابتسمت:
- روحت ليوم ما رجع
ابتسمت ضي وقد فهمت كل شيء دون أن تحتاج إلى شرح ثم قالت بمرح لتكسر ثُقل اللحظة:
- طب يلا بقى عشان جوزك المجنون عمّال يبُص عليكي... وهيولع من الغيرة
ضحكت سما وتعلّقت بذراع أختها و تحركا معًا نحو الخارج.
بعد منتصف الليل بقليل كانت الفيلا قد غرقت في الصمت
اتجه فهد إلى الحديقة الخلفية بهدوء حتى لا يشعر به حبيب الغافي أسفل الشجره أغلق الباب الزجاجي خلفه دون أن يصدر صوت سار نحو آخر الحديقة حيث الأشجار الكثيفة التي تحجب الرؤية عن نوافذ البيت وقف هناك ينظر إلى البحر لم يكن في يده طعام هذه المرة
ولم تكن على وجهه تلك الابتسامة البلهاء التي يعرفها الجميع
كان وجهه ساكن صلب وعيناه حادتين تراقبان كل شيء حوله بانتباه رجل اعتاد ألا يأمن لشيء رجل يحسب كل خطوة قبل أن يخطوها كان فهد آخر تماما... فهد لا يعرفه أحد في هذا البيت
سمع خطوات خلفه فلم يلتفت كان يعرف صاحبها من وقع قدميه
وقف معاذ بجواره وأشعل سيجارة نفث دخانها ببطء ثم قال دون مقدمات:
- كنت فاكرك هتاكل لحد ما تموت النهارده
ابتسم فهد ابتسامة جانبية باردة:
- الدور محتاج كده... لو بطلت أكل في فرح أختي هيشكوا
- أنت بتأكل بجد على فكرة
- مش بالكمية دي يا معاذ نص الطبق ده كان بيروح للقطط ورا المطبخ
ضحك معاذ ضحكة قصيرة ثم ساد صمت ثقيل بينهما وبعد لحظات قال معاذ بنبرة مختلفة:
- اتصلوا بيا النهارده قبل الفرح
لم يتحرك في وجه فهد شيء لكن عضلة في فكه انقبضت للحظة:
- أنا عارف
- عارف إيه
- عارف إنهم اتصلوا بيك عشان أنا قفلت تليفوني
كنت عايز ليلة واحدة ليلة فرح أختي من غير شغل
نظر إليه معاذ اليه للحظات ثم قال:
- مهمة جديدة يا فهد وانت الوحيد اللي ينفع فيها
أطلق فهد زفرة طويلة ونظر إلى السماء:
- كل مرة بيقولوا كده
- المرة دي بجد محتاجين حد محدش يشك فيه
حد الناس شايفاه عيّل بيهزر ومَلوش في أي حاجة
وانت عملت الشخصية دي سنين محدش في الدنيا هيشك فيك
- ولا حتى أهلي شكوا فيا
قالها فهد بمرارة فوضع معاذ يده على كتفه:
- ولا أهلك... وده اللي حامي الكُل... جودي وآسر وأبوك
لو حد عرف إنت مين هيبقوا هما أول ناس في الخطر
هز فهد رأسه ببطء كان يعرف ذلك جيدًا كان يعرفه منذ اليوم الأول الذي قرر فيه أن يرتدي هذا القناع لكن هناك شخص واحد لم يستطع أن يخفي عنه الحقيقة
قال معاذ وكأنه قرأ أفكاره:
- ورهف...
التفت إليه فهد بحدة:
- مالها رهف؟
- انت وعدتها... أنا عارف إنك وعدتها تسيب الشغل
صمت فهد وطال صمته حتى ظن معاذ أنه لن يجيب ثم قال بصوت خافت:
- وعدتها آخر مرة... وقولت إنها آخر مرة... وهي صدقتني
- كانت آخر مرة فعلا...
نظر إليه فهد نظرة حزينة ولم يَجب
ألقى معاذ سيجارته وداسها بقدمه ثم قال:
- الملف هيوصلك بكرة الصبح معاك أسبوع تفكر
بس أنا عارف إنك مش هتقول لأ
استدار عائدًا إلى حبيبته التي غفت للتو من شدة الإرهاق وترك فهد وحيدًا مع البحر.
أخرج فهد هاتفه الثاني من جيب سري في سترته هاتف لا يعرف بوجوده أحد وفتح المحادثة الوحيدة المحفوظة فيه كانت صورتها تملأ الشاشة... رهف
بشعرها الأسود المنسدل وضحكتها التي تشبه الصباح كتب:
- صاحية...؟
لم تمر ثانية حتى جاء الرد
- لأ نايمة وبرد عليك وأنا بحلم 🙄
ابتسم فهد رغمًا عنه ابتسامة حقيقية هذه المرة لا يمثلها لأحد وضغط على زر الاتصال
جاءه صوتها ناعس لكنه يحمل ذلك الدلال الذي يُذيب قلبه:
- خِلص الفرح؟
- خلص
- أكلت كام طبق يا مفجوع؟
- تلاتة بس كنت بفكر فيكي في كل طبق
- يعني أنا زي المحشي عندك؟
- لأ انتي زي الشاورما أنا ممكن أسيب المحشي بس الشاورما لأ
ضحكت ضحكة عالية ثم كتمتها فجأة:
- هش... ماما هتصحى
- طب ما تصحى أنا جاي أخطبك أصلًا
صمتت على الطرف الآخر ثم قالت بصوت أهدأ:
- بجد يا فهد؟
شعر بشيء ينقبض في صدره فقد سمع في صوتها ذلك الأمل الذي يخشاه الأمل الذي يعرف أنه قد يكسره
- بجد يا رهف
- يعني خلاص... سبت الشغل
أغمض عينيه ورأى ملف المهمة الذي لم يفتحه بعد رأى وجه معاذ وهو يقول إنه الوحيد الذي يصلح لها رأى وجهها هي... وهي تبكي في المرة الأخيرة وتقول له إنها لن تحتمل خوفًا آخر
قال الكذبة بسهولة مخيفة:
- خلاص يا رهف... خلصت
سمع تنهيدتها الطويلة وكأنها تتخلص من حمل ثقيل حملته سنوات ثم قالت بصوت يرتجف:
- أنا مش مصدقة... انت مش عارف أنا كنت بموت
كل مرة بتسافر فيها كل مرة تليفونك بيتقفل
كنت بقعد أعد الساعات
- عارف
- لأ مش عارف انت عمرك ما هتعرف
قالت فجأة بنبرة مختلفة نبرة فيها تهديد ناعم يعرفه جيدًا:
- بس اسمع يا فهد لو طلعت بتكدب عليا...
- مش بكدب
- لو طلعت بتكدب عليا المرة دي مش هسامحك فاهم
المرة دي هتخسرني بجد
ضحك فهد ضحكة خفيفة يحاول بها أن يخفي ارتعاش قلبه
- يا ساتر.... ده انتي بقيتي أخطر مني
- أنا طول عمري أخطر منك انت بس اللي مش واخد بالك
- طب يا خطيرة... نامي بقى عشان بكرة تصحي حلوة
- أنا حلوة على طول
- ده مش محتاج تأكيد ده معلومة مؤكدة
ضحكت مرة أخرى ثم قالت بصوت خافت كأنها تهمس في أذنه:
- وحشتني
- وانتي وحشتيني أكتر من الفطير اللي غالية هتعمله بكرة
- يا رخم
- بحبك يا رهف
صمتت لحظة ثم قالت بنعومة أذابته:
- وأنا كمان... تصبح على خير يا كداب
وأغلقت ظل فهد ينظر إلى الشاشة المظلمة كانت كلمتها الأخيرة تتردد في رأسه:
- يا كداب
قالتها مازحة لكنها لم تكن تعرف كم كانت صادقة.
أغلق ياسر باب الغرفة بقدمه وما زالت جودي بين ذراعيه أنزلها ببطء حتى لامست قدماها الأرض لكنه لم يبعد يديه عن خصرها
كانت الغرفة غارقة في ضوء خافت من شموع صغيرة رصتها غالية على الطاولة وعلى حافة النافذة ورائحة الورد تملأ المكان وقد نثرت بتلاته الحمراء على الفراش الأبيض
نظرت جودي حولها بدهشة ثم همست:
- غالية عملت كل ده!
- شكلها كانت عارفة إن حسن هيصمم
ضحكت جودي ضحكة متوترة ابتعدت عنه خطوة نحو المرآة كأنها تبحث عن شيء تشغل به يديها بدأت تمشط شعرها وأصابعها ترتجف
وقف ياسر خلفها يراقب انعكاسها في المرآه ثم اقترب ببطء حتى صار صدره يلامس ظهرها أمسك يدها برفق
- سيبيني أنا هيرحهولك
تجمدت جودي في مكانها وراح ياسر يحرك المشط بتأني كأنه يملك الليل كله وحين انسدلت خصلاتها وانفرط شعرها على كتفيها أغمض عينيه واستنشق عطره بعمق
همس بصوت أجش:
- عارفة كام مرة حلمت باللحظة دي؟
- ياسر...
- وأنا هناك في الضلمة كنت بقفل عيني وأتخيلك كده بالظبط
كنت بقول لنفسي لازم أرجع لازم أعيش عشان أشوفها بالفستان ده
استدارت جودي إليه وقد امتلأت عيناها بالدموع وضعت كفها على صدره حيث يدق قلبه بعنف:
- وأنا كل يوم كنت بقول لربنا رجّعهولي وأنا مش عايزة حاجة تانية من الدنيا
مسح دمعتها بإبهامه ثم انحنى وطبع قبلة على جفنها المبلل ثم على الآخر ثم على وجنتها كانت كل قبلة أبطأ من التي قبلها
حين وصل إلى شفتيها توقف قيد شعرة... نظر في عينيها يسألها دون حرف
فأجابته هي... بأن تعلقت برقبته وجذبته إليها
كانت قُبلة طويلة تحمل كل الشوق والخوف والليالي التي انتظرا فيها شعرت جودي بيديه تشتدان حول خصرها وتجذبانها إليه أكثر حتى لم يعد بينهما شيء
ابتعد عنها قليلا يلتقط أنفاسه ثم مد يده إلى ظهر الفستان حيث صف طويل من الأزرار الصغيرة تحسسها بأصابعه ثم قال بجدية مصطنعة:
- مين المجرم اللي عمل الفستان ده؟
انفجرت جودي ضاحكة ودفنت وجهها في صدره:
- خمسين زرار
- خمسين...
- وفي سوستة تحتهم كمان
- ده تعذيب ده أنا اللي اتخطفت ومحدش عمل فيا كده
ضحكت حتى دمعت عيناها وزال التوتر من جسدها تمامًا... بدأ هو يفك الأزرار واحدا واحدا وهو يعدها بصوت مسموع ليضحكها وكلما فك زرًا طبع قُبلة على كتفها حتى صارت تضحك وترتجف في آن واحد وعند الزر الثلاثين توقف وأدارها نحوه وهمس:
- نكمل الباقي بعدين أنا مش قادر أستنى عشرين كمان
أطفأ الشمعة الأقرب إليهما بأنفاسه.
جلس فهد على صخرة قريبة من السور وأسند ظهره إلى جذع شجرة عتيقة عاد بذاكرته إلى الليلة التي عرفت فيها رهف الحقيقة كان ذلك قبل ثلاث سنوات
كان يعرفها منذ شهور فتاة تعمل في مكتبة صغيرة في وسط البلد يمر عليها كل يوم بحجة شراء كتاب
لا يقرؤه كانت هي تعرف أنه لا يقرأ وتضحك عليه في سرها ثم صارت تضحك عليه في وجهه
في المرة الأولى قالت له وهي تغلف كتاب عن الفلسفة الألمانية:
- انت عارف إن ده كتاب عن ...
ذكرت اسم المؤلف فرد عليها بثقة:
- عارف طبعًا ده صاحبي
- بجد... بيشتغل إيه؟
- كان بيبيع حواوشي في شبرا
لم تتمالك نفسها ضحكت حتى انحنت على المكتب ومنذ ذلك اليوم صار يأتي كل يوم ليسمع تلك الضحكة
و حينما يعود إلى أمريكا كانت تفتقده كثيرًا و تنتظر عودته الي مصر بفارغ الصبر
لكن الليلة التي غيرت كل شيء كانت ليلة شتاء ممطرة
كان عائد من مهمة سرية وكان مصاب بجرح في ذراعه... لفه على عجل بقطعة قماش ولم يكن يستطيع أن يعود إلى بيت أبيه بهذا الشكل ولا أن يذهب إلى مستشفى
وجد نفسه دون أن يدري يقف أمام باب شقتها
فتحت الباب ورأته رأت الدم الذي تسرب من القماش ولطخ قميصه فشهقت وجذبته إلى الداخل دون أن تسأل
جلس على الأريكة صامت بينما أحضرت هي علبة الإسعافات وراحت تنظف جرحه بيدين مرتجفتين حين انتهت جلست أمامه على الأرض نظرت في عينيه للحظات ثم قالت بهدوء أرعبه:
- انت مين يا فهد؟
حاول أن يرسم ابتسامته المعتادة:
- أنا فهد. بتاع الشاورما و...
- متهزرش
قالتها بحدة لم يعهدها منها ثم أكملت بصوت مكسور:
- أنا مش غبية انت بتختفي أسابيع وتليفونك بيتقفل
بترجع خاسس وعينك فيها حاجة غريبة
أنا كل اللي اعرفه عنك انك إبن رجل أعمال كبير في أمريكا
وبتنزل مصر كتير عشان تتابع شغل أبوك
النهارده جايلي غرقان دم ومش عايز تروح مستشفى... انت مين؟
نظر إليها فهد للحظة كان يعرف أن أمامه طريقين أن يكذب ويخسرها أو أن يقول الحقيقة ويضعها في خطر للمرة الأولى في حياته اختار أن يكون صادق
حكى لها كل شيء أو على الأقل كل ما يستطيع أن يحكيه كانت تسمعه صامتة والدموع تنساب على وجهها دون صوت حين انتهى قالت جملة واحدة لم ينساها أبدًا:
- يعني كل الضحك ده كان تمثيل
أمسك يدها وقربها من شفتيه:
- كل حاجة تمثيل إلا معاكي أنا بضحك معاكي بجد
من يومها صارت رهف الوحيدة في هذا العالم التي ترى وجهه الحقيقي
والوحيدة التي يخاف أن يخسرها... عاد بذاكرته و تنهد بهم .
على بعد مئتي كيلومتر في شقة صغيرة بحي المنيل كانت رهف تجلس على فراشها في الظلام تحتضن هاتفها وتبتسم للسقف كالبلهاء
لم تستطع أن تنام بعد المكالمة كانت كلمته تدور في رأسها كأغنية لا تنتهي
- خلاص يا رهف... خلصت
قامت من الفراش وفتحت درج الكومود أخرجت منه علبة خشبية صغيرة جلست على الأرض وفتحتها ببطء كأنها تفتح كنز
كانت العلبة مليئة بأشياء لا قيمة لها عند أحد سواها تذكرة سينما قديمة لفيلم لم يشاهدا منه شئ لأنهما قضيا الوقت يتشاجران على الفشار ورقة من مطعم شاورما كتب عليها بخط رديء :
- أنا بحبك أكتر من التومية
ومنديل ورقي ما زال يحمل أثر دمه من ليلة المطر
أمسكت المنديل بين أصابعها ثم أعادته إلى العلبة وأغلقتها بقوة
همست لنفسها:
- خلاص... مفيش دم تاني مفيش خوف تاني
التقطت الهاتف وفتحت المحادثة سجلت رسالة صوتية بصوت ناعس يقطر دلالًا:
- على فكرة أنا لسه صاحية ومش عارفة أنام
وده ذنبك انت عشان كده انت مُطالب بتعويض
أول ما ترجع القاهرة عايزة عشا وورد ومش أي ورد
ورد أحمر وكتير وعايزاك تلبس القميص الكُحلي اللي بيبين كتافك
آه وكمان عايزاك تقعد قصادي ومتبُصش
في تليفونك ولا مرة ولو بصيت هاخد التليفون أرميه في النيل
ثم ضحكت وأضافت بصوت أخفض:
- وعايزة حاجة كمان بس دي مش هقولها في ريكورد
هقولهالك في ودنك
أرسلتها قبل أن تتراجع ثم دفنت وجهها في الوسادة وهي تصرخ صرخة مكتومة من الخجل
لم تمُر دقيقة حتى اهتز الهاتف برد منه... رسالة مكتوبة هذه المرة
- أنا لسه سامع الريكورد عشر مرات
وعندي سؤال واحد الحاجة اللي هتقوليها في ودني
دي حلال ولا هنحتاج مأذون؟!
شهقت رهف وكتبت بسرعة وأصابعها ترتجف من الضحك:
- يا قليل الأدب
- انتي اللي بدأتي يا ست الأدب كله
- انا قصدي أقولك بحبك
- آه طبعا... واضح جدًا من نبرة الصوت إن قصدك بحبك
ضحكت حتى دمعت عيناها وفجأة انفتح باب الغرفة ظهرت أمها بشعر منكوش وعينين نصف مغمضتين:
- انتي بتعيطي ولا بتضحكي يا بت؟!
اعتدلت رهف بسرعة وخبأت الهاتف تحت الوسادة:
- لا يا ماما بضحك على فيديو
- فيديو إيه دلوقت يابت
- فيديو قطط
نظرت إليها أمها بريبة ثم قالت:
- القطط دي اسمها فهد
احمرّ وجه رهف حتى أذنيها وتلعثمت:
- ماما...
- نامي وقولي للقطة بتاعتك لو عايز يتكلم بالليل ييجي يكلم أبوكي الأول
أغلقت الباب فسقطت رهف على ظهرها فوق الفراش تضحك وتضرب الوسادة بقبضتيها
بعد دقائق حين هدأت التقطت الهاتف من جديد وكتبت له رسالة أخيرة:
- ماما عرفت... وبتقولك تعالى كلم بابا
- قوليلها جاي الأسبوع ده
نظرت إلى الكلمات للحظة ثم ابتسمت ابتسامة واسعة وقررت شئ
لن تنتظر حتى يعود إلى القاهرة ستذهب هي إليه في الإسكندرية غدًا مفاجأة لن ينساها
أغمضت عينيها ونامت وهي لا تعرف أن المفاجأة الحقيقية تنتظرها هي.
حين عاد إلى البيت كانت الساعة قد تجاوزت الثامنه صباحًا سار في الممر المُظلم بخطوات لا تصدر صوت ثم توقف فجأة كان هناك ضوء خافت يتسرب من المطبخ
تقدم بحذر وقد عادت عيناه حادتين يقظتين يده تتحرك تلقائي نحو خصره حيث لا يوجد شيء ثم دفع الباب ببطء كان آسر يقف أمام الثلاجة المفتوحة وفي يده قطعة دجاج
التفت إليه آسر وتجمد كمن ضُبط متلبس ثم قال بفم مُمتلئ:
- انت جيت خلاص؟!
في لحظة واحدة سقط القناع على وجه فهد من جديد كأنه لم يرفعه قط اتسعت عيناه ببلاهة مصطنعة وفتح فمه مصدومًا وأشار إلى الدجاجة:
- دي بتاعتي يا آسر... أنا كنت شايلها لبكرة
- كان مكتوب عليها اسمك يعني
- كان مكتوب عليها في قلبي
ضحك آسر وألقى له بقطعة فالتقطها فهد في الهواء جلس على الرخامة يأكل بنهم مبالغ فيه
قال آسر وهو يغلق الثلاجة:
- انت مش بتشبع أبدًا!
- الشبع ده إحساس الضعفاء
هز آسر رأسه يائسًا... خرج وهو يضحك بقي فهد وحده في المطبخ يمضغ ببطء وقد عادت عيناه تحدقان في الفراغ هناك على الرخامة بجواره اهتز هاتفه الثاني برسالة جديدة:
من رقم مجهول:
- الملف جاهز... السفر بعد يومين ومحدش يعرف ولا حتى هي
ماذا سيحدث يا ترى؟.......
سنرى......
انتظرووني......
بقلمي / فريده الحلواني.....
