رواية السارقه البريئه الفصل الرابع بقلم فريده الحلواني

رواية السارقه البريئه البارات الرابع بقلم فريده الحلواني

رواية السارقه البريئه

الفصل الرابع

بقلم فريده الحلواني

حاسه انك عايشه في هم و سواد مالي حياتك تمام.....عارفه سيدنا محمد صلي الله عليه و سلم لما مر بعام الحزن ....بعدها ربنا سبحانه و تعالي كافئه بالاسراء و المعراج ....طبطب علي قلبه و راضاه

انتي دلوقت في عام حزنك بس خلاص هانت ربنا هيبعتلك معراج خاص بيكي يخرج من كل ده....و هيطبطب علي قلبك و هيراضيكي انا واثقه ....اطمني

انا بحبك

__________________

كادت دينا ان تجن و هي تجلس مع زوجه اخ زوجها الراحل و قلبها يعتصر رعبا علي اختها المختفيه منذ ليله امس .....و لكنها حاولت مدارات قلقها و تابعت التحدث مع هند ...تلك المراه الحقوده التي تستغل طيبه دينا في الاستفاده منها ...و من الممكن ان لها غرضا اخر لم تفصح عنه بعد

كانت. تجلس باريحيه و كانها في منزلها ...نازعه عنها حجابها بل الادهي انها خلعت ايضا عبائتها و جلست بقميصا قطني ضيق دون اكمام

نظرت لدينا و قالت بخبث : هو سي فوزي هيصحي امتي اول مره يتاخر كده

دينا بحسن نيه : ده راجع وش الصبح و الله علي ما جه دوره و حمل العربيه قالي هنام ساعتين و صحيني بس الصراحه صعبان عليا قولت اسيبه شويه كمان

هند : لا كده هيتاخر و ممكن يزعقلك ...نظرت بمكر و قالت : قومي يا بت البسي حاجه مدندشه كده و ادلعي عليه و انتي بتصحيه الراجل شقيان و محتاج الحنيه

دينا ببلاهه : البس ايه ما انا لسه اخده دش و الله و لابسه جلبيه نضيفه

هند : يا بت متبقيش عبيطه البسي قميص نوم كده و لا كاش مايو

دينا بكسوف : لا ياختي اتكسف

هند : انتي هبله حد يتكسف من راجله ...هو انتي مش بتلبسي قمصان خالص

دينا : لا بتكسف ...بحس شكلي وحش فيهم

كادت ان ترد عليها بمكر كما اعتادت الا انها وجدت طوفان يهجم عليهم

حبيبه بغيظ لم تستطع كتمانه : ااااااه يا حببتي اختي لابسه و انتي قالعه ...مانتو صحاب بقي و بتكملو بعض

انتفضت هند بغضب و قالت : قصدك ايه يا حبيبه ...دي دينا اختي و يعلم ربنا انا اتمنلها الخير ...مش انا سلفتها و جوزي ميت بس هي الوحيده الي مقطعتش الود بينا ..

حبيبه : هو انا قولت حاجه ...نظرت لها باستهزاء و ااكملت : بس يعني مينفعش تقعدي كده و نص صدرك طالع بره ...في راجل فالبيت ياختي ممكن يطلع في اي وقت

هند ببجاحه : اخص عليكي يا بيبو ...ده سي فوزي زي اخويا بالظبط

القت نظره غاضبه تجاه دينا التي زاغت بعيناها حتي لا تواجه اختها ثم قالت بوقاحه : بس انتو مش اخوات يا قطه ...يعني لو شافك بالمنظر ده مش هيشتهيكي ....البسي ياختي استري نفسك ...و تعالي معايا فوق علي ما دينا تصحي جوووووزها ...هاااا ...و يفوق براحته بعدين نبقي ننزلهم تاني ....اصل ميصحش نبقي قاعدين علي قلبهم ...غمزت بمغزي و اكملت : اكيد انتي عارفه الراجل الصبح بالذات بيبقي .....ههههه انتي فاهمه بقي

اشتعل الغضب داخل صدر تلك الحاقده و التي تعلم جيدا ان حبيبه تكشف نواياها ....سحبت عبائتها بغيظ ثم قامت بارتدائها سريعا ....القت وشاحها فوق راسها باهمال ثم قالت : لا و علي ايه ...انا كده كده كنت ماشيه ...العيال لوحدهم

دينا باحراج : ليه يا بنتي و الله لانتي قاعده متغديه معانا ...و اتصلي بالعيال خليهم ييجو كمان ده فوزي هيزعل لو عرف انك جيتي و مشيتي من غير ما يشوفك

كادت حبيبه ان تجن من اختها الحمقاء و لكنها هدات قليلا حينما سمعت الاخري تقول : معلش ياختي سلميلي عليه ....و ابقي اشوفه وقت تاني ...فوتكم بعافيه

نظرت دينا لاختها الغاضبه و قالت : اخص عليكي يا بيبو كسفتي الوليه

صرخت بجنون : يا لهووووووووي هتجلط ...هتجلطيني ...

.يابت الهبله سايبه واحده قاعده مبينه جسمها و جوزك هنا ....انتي هتفضلي هبله كده لحد امتي ....و بعدين ازاي تعرفيها بتلبسي ايه و متلبسيش ايه دانا اختك و محاولتش اسالك ....لو مش خايفه انها تشقط جوزك ياختي....اعملي بكلام ربنا انه حرام تطلعي خصوصياتك انتي و جوزك لحد

دينا بطيبه : و الله هند طيبه و كانت بتنصحني ...ده هي الوحيده الي بتطل علينا من اهل فوزي

حبيبه بنفاذ صبر : هي مش من اهله يا دينا دي واحده جوزها مات يعني الي بينها و بين العيله هو عيالها و بس ...و بعدين هو انتي محتاجه نصيحه من حد ...مانا ليل نهار نشف ريقي معاكي و مش بتسمعي كلامي ....زفرت باختناق ثم قالت : بصي و هفكرك ...انتي مش هتتعلمي غير لما تخطف جوزك منك انتي حره بقي

دينا بزعر : يا لهووووي ...دانا اموت فيها ...خلاص و الله معودتش هحكي حاجه تاني ....خلاص حرمت ....المهم انتي كنتي فين من امبارح دانا هتجنن عليكي و تليفونك مقفول

زفرت حبيبه بحنق ثم تمالكت حالها و مثلت الفرحه و هي تقول : اسكتي يا بت دانا وقعت علي ناس عليوي اووووي ....هاشم الجندي تعرفيه طبعا

شهقت دينا بزهول و قالت : هاااااا بتاع شركات الحديد و الصلب و القري السياحيه ....ده مش سايب حاجه فالبلد غير و داخل فيها ....لسه شيفاه من يومين مع الريس مش عارفه في مؤتمر ابصر ايه كده

ابتسمت حبيبه علي سجيه اختها و قالت : ده مش مؤتمر ده وفد لاكبر رجال الاعمال كانو بيناقشو استثمارات جديده مع ناس جايه من بره عايزه تعمل شغل هنا .....المهم هو ده بقي الي كان محتاج مترجم ايطالي و البت دعاء رشحتني ليه .....شغلي عجبه و طلب مني اسافر معاه شرم و ايطاليا لمده ست شهور عشان عامل شغل كبير مع جماعه طاليان و محتاجني اكون مرافقه ليهم

ضربت دينا بكف يدها فوق صدرها و قالت : يا لهووووي ست شهور يا بيبو و كمان هتسافري بره مصر ....انا افرحلك و الله ....سالت دموعها و اكملت : بس انا مليش غيرك هقعد ده كله ازاي من غير ما تكوني معايا

احتضنتها بحب و قالت : و لا انا اقدر استغني عنك يا عبيطه دانتي كل عيلتي هو احنا لينا غير بعض....ابعدتها و اكملت : انا اتفقت معاه ان هنزل كل اسبوعين اجازه عشان اشوف اهلي و كده ....تنهدت بهم و قالت : الفرصه دي مش بتيجي فالعمر غير مره واحده ياختي خلينا نطلع مالفقر الي هرس لحمنا و نقب علي وش الدنيا .....خلي عيالك يطلعو مرتاحين بدل ما يدوقو المر الي شربناه من و احنا صغيرين

دينا بجديه : ربنا يرزقك من وسع يا حبيبه بس ده شقاكي ياختي اعمليلك قرشين تتسندي بيهم انا الحمد لله فوزي مش منقصني حاجه علي قد مقدرته و انا راضيه و الله

حبيبه : انتي هبله يا دينا هو انا بقولك انه مقصر معاكي انا عارفه انه جدع و بيحبك و لو يطول يجبلك نجمه من السما مش هيتاخر ....هو انا انساله وقفته قصاد اهله عشانك و لا لما صمم يتجوزك و بقي يجبلك الي ناقصك من وراهم عشان محدش فيهم يعايرك ان جهازك ناقص....ده غير المشاكل الي حصلت معاهم بعد جوازك و صمم انه يطلع بيكي من بيت العيله و بعد ما كان عايش في ملكه اخد شقه ايجار عشان يشتري راحتك ...و بدل ما كان شغال في محلات ابوه بقي شغال عند الناس و كل ده لجل عيونك يا بت .....هو انا انساله ده كله

دينا : يا حببتي يخليكي ليا بس بردو القرشين الي يطلعولك ممكن تاجري بيهم محل و لا حاجه كده تاكلي منها عيش

ضحكت بصخب علي طيبه او سزاجه اختها ثم قالت : دينا انتي فاكره ان انا هطلع بكام من الشغلانه دي ....نظرت لها دينا بحيره فاكملت و هي تخرج رزمه كبيره من المال و تضعهم في يد اختها : امسكي يا دودو ...دول عشرين الف جنيه حق شغلي في يوم واحد

جحظت عيني دينا بزهول و هي تنظر الي المال الموضوع في يدها ثم تطلعت لاختها بشك و قالت : بت انتي هو ايه الي حصل بالظبط عشان تاخدي كل ده في كام ساعه

دمعت عيناها و قالت بحزن : انتي تعرفي عني كده يا بنت امي و ابويا ...

هو انا لو عايزه ابيع شرفي كان ده بقي حالي

دينا باسف : حقك عليا و الله ماقصد الي جه في دماغك انا قصدي يكون بيزغلل عينك بالفلوس الكتير دي عشان يجر رجلك

ابتسمت حبيبه بهم و قالت : اطمني يا حببتي الفلوس الي مستكتراها دي متجيش تمن عشوه عندهم ....المهم انا هطلع اجهز نفسي عشان الحق ارجعلهم تمام ....انزلي هاتي للعيال هدمتين حلوين بس متسترخصيش ....و شوفي الواد احمد كان ناقصه دروس ايه و خليه يروح السنتر ....و اتا قبل ما امشي هفتحلك محفظه علي تليفونك عشان لو معرفتش انزل اجازه ابعتلك عليها فلوس

بعد ان صعدت شقتها الصغيره ....جلست علي الاريكه الوحيده المتواجده لديها ....غرزت اصابعها داخل خصلاتها الناعمه تجزبهم بجنون و عقلها يعمل كالمرجل ....ماذا فعلت بحالها ....لما اقحمت نفسها في حيات هاشم ...الم تجد غيره ....تذكرت كلماته السامه التي القاها عليها قبل ان يدلف الي مكتبه .....و ايضا ما سمعته يقوله حينما وقفت خلف الباب تسترق السمع

فلاش بااااااااك

_____________

دلف ابراهيم خلف اخيه و هو يشعر بالحنق منه فقد لمح حزن تلك الجريئه .....

وقف قبالته و قال بغيظ : يابني انت مش هتبطل الدبش ده .....فهمني في ايه يا هاشم و ايه الي فدماغك

نفث دخان سيجارته و قال : ابدا ....البت حلوه و ذكيه عجبتني قولت ليه مستفدش منها

ابراهيم : كان ممكن تشغلها معاك فالشركه انما تتجوزها و رسمي كمان ...مستغربك بصراحه

هاشم : جدك قارف امي ليل نهار عشان اتجوز و انا عمري ما هربط حياتي بواحده ....اذا كنت بزهق بعد اسبوع ازاي هعيش باقي عمري مع واحده بس ....قولت ادخل عليه بحكايه كده كام شهر و خلاص محصلش نصيب و هو عارف ان مش هكرر التجربه تاني فهمت.....اما بالنسبه للشغل بقي فالبت طلعت اديها خفيفه دي سرقت الفون بتاع مساعد بيتر من غير ما يحس لولا ان فهمتها ....نظر له بمكر و اكمل ؛ اظن كده فهمت انا عايز منها ايه

جزت علي اسنانها غيظا مما سمعت ثم اتجهت الي الاعلي حتي لا يكتشف تجسسها عليه ...و بعد مرور نصف ساعه وجدته يدلف عليها دون استأذان فقالت بغيظ : احنا هنبدأها كده و لا ايه ...مش في باب تخبط عليه

اقترب منها بتمهل مميت ....وقف قبالتها ثم لف زراعه حول خصرها بقوه حتي لا تفلت منه و هي تحاول دفعه ثم قال : اتهدي بقي و اسمعي الكلمتين الي هقولهم

وقفت ثابته رغم اهتزازها من الداخل فاكمل بجديه : هتروحي تبلغي اختك بالي اتفقنا عليه ....السواق هيوصلك و يستناكي بعيد شويه عن الحاره ...ساعه زمن و تكوني رجعالو ....اي حركه غدر منك مش هسيبك ....احنا بينا اتفاق و لازم يتنفذ

نظرت له بسخريه و قالت. : غدر ايه يا باشا ...انا بقيت مراتك ...يعني الي بينا عقد جواز مش عقد شغل

تلك الكلمه حركت به شيئا ما ...وجد حاله ينظر لثغرها المغوي باشتهاء ....هل هاشم الجندي يحرم نفسه من شيئا يشتهيه.....لا و الله

دون اي مقدمات ...رفع يده ليمسك راسها من الخلف ثم مال عليها ملتقطا تلك الشفاه الوقحه ليهديها قبله جامحه ....جعلت كل خليه بجسده تنتفض وهو يتعمق بها اكثر. لشعوره باختلافها

اما هي حاولت ان تقاومه الا انه كان محكم السيطره عليهاا ...

.برغم انه لم يكتفي و كان يتمني المذيد الا انه ابتعد و قال بمزاح شهواني : عسل ...شفايفك فراوله

ضربته بقبضتيها في صدره و قالت بغضب : ازاااااي تسمح لنفسك تعمل كده ....مش ده اتفاقنا ....ليييييه كده

بخبرته كزير نساء علم انها قبلتها الاولي ...ابتسم وقال ببرود : عشان اخدت اول بوسه منك يعني ....عادي يا فراوله اعتبريها بوسه كتب الكتاب ...حلال يعني لو ده الي فارق معاكي

ردت عليه بكيد : هههه و ايش عرفك انك اول واحد يبوسني

لا يعلم لما شعر بالضيق داخله و لكنه تطلع لها بثقه و قال : الي قدامك ده خبره يا ماما من و انا فالاعداديه .....تفتكري مش هعرف الست الي قدامي اتلمست من حد و لا لا حتي من قبل ما اقربلها ....ضرب علي وجنتها برفق و اكمل : اعرفي ان معاكي هاااااشم الجندي

ردت عليه بغيظ : فخور اوي بصياعتك ....اكملت بالايطاليه : ايها الحقير البارع ...لن ادعك تقترب مني مره اخري ...وعدتك. اني ساقطعه لك ...كي نري كيف ستتباها بوقاحتك ...تبا لك

كاد ان يملأ الدنيا ضحكا علي ما قالته و لكن تمالك حاله بصعوبه و قال : بتقولي ايه يا بت ....ليه حاسس انك بتشتمي

ضحكت بحلاوه و قالت : حاسس مش متاكد

بااااااااااااك

______________

زفرت بهم ثم قامت كي تجهز حالها و تدعو الله ان يعينها علي ما هي مقدمه عليه

وصلت الثلاث فتيات تباعا الي قصر الجندي بوجوها متجهمه

نظرت امل و نورا الي بعضهما البعض بارتياب ثم سالت الاخيره بتوجس : مالكم يا بنات في ايه

ردت شروق سريعا بكذب : ابدا يا عمتو انا بس مرهقه شويه كان عندي محاضرات كتير النهارده

نظرت امل لها بعدم تصديق و لكنها أثرت الصمت حتي تختلي بها

نورا : و انتي يا كوكا مالك يا حببتي عينك منفوخه من العياط ليه حد زعلك

بكت ملك برقه و هي تقص لهم ما حدث و بعد ان انتهت قالت بخوف : الولد ده اصلا مش كويس ....خايفه يعمل حاجه لابراهيم او تحصل مشكله جامده

ضمتها امل بحنو ثم قالت : متخفيش يا كوكا محدش يقدر يعمل لحد فينا حاجه و بعدين هو يستاهل اكيد عمل حاجه وحشه عشان كده ضربه ...اهدي يا حببتي و ان شاء الله خير

امينه : خلاص بقي يا ملك انتي بتكبري المواضيع ليه

تطلعت لها نورا بشك و قالت : ايه الي حصل يا امينه انتي مش بتتعصبي كده غير لما تكون في مصيبه

خافت قليلا و لكنها بالنهايه حكت لهم ما فعلته في هذا الخلوق

تحولت نورا و تجهم وجهها بغضبا جم : ثم قالت انتي واحده مش متربيه ..ومن ميتا ونحنا بنتصرف مع حدا بالشكل هاد و بالذات لو كان انسان محترم ..انا لو مكانه كنت ضربتك كف علي وجهك يفوقك من الغباء و الحقاره اللي انتي فيها

انتي كيف تكوني بالشكل هاد مستحيل تكوني بنتي اللي ربيتها عالاخلاق والاحترام

دمعت عيني امينه بحزن بينما همست ملك لامل : هي عمتو بتقول ايه انا مش فهمت نص كلامها

امل بهمس مماثل : ادام رطنت بالليبي يبقي علي اخرها الاحسن محدش يرد عليها عشان متتعصبش اكتر

شروق : معلش يا عمتو اكيد متقصدش و هو كمان المفروض مكنش سابها و مشي دي امانه عنده

امل بحكمه : اي واحد مكانه كان هيعمل كده مش هي عامله سبع رجاله في بعض خليها تحمي نفسها بقي ...و بع.......

قطعت حديثها حينما وجدت هاشم يدلف عليهم بوجها غاضب للغايه فجاسر ليس مجرد حارس لديه بل يعتبره صديقا له و يثق فيه

وقف واضعا يده داخل جيبه بشموخ و هو ينظر لها بعيون ملتهبه مما جعلها ترتجف رعبا ثم قال : ايه الي عملتيه ده

امينه بخوف : اااا....معملتش

صرخ بها : كداااااابه

امينه بغضب : انا مش كدابه و بعدين ليه تصدقه هو قبل ما تسمعني انا

هاشم : هو اساسا مكلمنيش يا مؤدبه ....ايهاب هو الي اتصل بيا و حكالي ...من امتي بنعامل الناس بمبدأ اسياد و عبيد ....اوعي يا بت تكوني فاكره اننا من العيله المالكه و لا جدك لقي حتت أثار و باعها ...لااااااا فوقي ...جدك لحس الاسفلت عشان يقدر يقف علي رجله جابها من تحت السفر من اول ما كان بياع خضار بيلف بالقفص الي شايله علي ضهره طول اليوم لحد ما رجله تورم لحد ما ربنا كرمه بمحل متر في متر ...و لما عياله كبره اشتغله و شقيو لحد ما اسسه اول شركه ....كانو بيواصلو الليل بالنهار عشان يكبرو ...و احنا ....انا و مؤمن و ابراهيم مطلعناش متدلعين كنا بنروح المدرسه و نرجع عالشغل ....يعني طفحنه الكوته لحد ما وصلنا للي احنا فيه ...تيجي فالاخر عيله زيك تتكبر علي مخاليق ربنا ...اااااانسي مش هسمحلك ابدااااااا

مد يده بغضب ثم قال : فونك و الكريدت كارد

نظرت له بصدمه فصرخ بها : اااااااااخلصي

انتفضت بزعر ثم امسكت حقيبه يدها و اخرجت منها ما طلبه ...اعطتهم له فقال بحسم : ملكيش خروج مالبيت لحد ما تتربي.....انا بعت اجيب جاسر ...هتعتزريلو قدام الكل ساااااااامعه

دلف الجد عليهم و قال : في ايه يا هاشم بتزعق ليه

بكت امينه كي تستعطف الجد و قالت : يرضيك يا جدو هاشم يبهدلني عشان خاطر صاحبه و كمان منعني من الخروج ...طب و الكليه و المحاضرات اعمل ايه

قبل ان يتفوه الجد بحرف وجد حفيده يقول ببرود : انا مسافر ايطاليا بالليل يا جدي عندي شغل مهم هغيب اسبوع....نظر لنورا و اكمل : البنت دي متخطيش بره باب القصر لحد مارجع ...تمام ...ابقي احكي لابوكي عالي عملته ....و فقط تركهم متجها الي الاعلي دون ان ينتظر ردا من احد

جهز حاله سريعا و هو يتابع السائق الذي ينتظر تلك المجنونه كي يعيدها اليه....لا يعلم لما يخاف هروبها ....لا يستطع إخراج هذا الهاجس من عقله فقرر ان يذهب اليها بنفسه اذا تاخرت اكثر من ذلك

ماذا سيحدث يا تري

سنري

متنساش ان الروايه موجوده كامله في قناه التليجرام

والواتساب

👆👆👆👆

📚 لقراءه الفصل الثاني من هنا ♡♡♡ الفصل الخامس

✍️ لقراءه السارقه البريئه كامل اضغط هنا👇

👈 روايةالسارقه البريئه كامله 👉

انتظرووووووني

بقلمي / فريده الحلواني

تعديل المقال

روايات كوكب السكر

رواية السارقه البريئه الفصل الرابع بقلم فريده الحلواني